Latest News

CM hova sawrkar mi pawimawh thukhawmin Ramri-a Assam sawrkar chet dan an dem tih an sawi

Chief Minister Zoramthanga hova nimin-a Minister te leh mi pawimawh te thukhawm chuan ramri-a Assam sawrkar chet dan an dem thu sawiin, ramri-ah Mizoram a tawlh dawn lo tih an sawi. Chief Secretary chuan Inrinni-a Phainuam Buarchep hmuna thil thleng chungchanga thudik lo thehdarh ah Assam sawrkar a puh bawk.

Nimin khan Chief Minister Office Conference Hall-ah Chief Minister, Zoramthanga hovin Council of Ministers leh Mizoram MP te bakah, Assembly Speaker, Serlui bialtu MLA leh MNF Gen. Hqrs. OB te chu thukhawmin tunhnaia Assam leh Mizoram ramri-a thil thleng chungchang an sawiho a. Tunhnaia Assam lam te ramri-a an rawn che thar leh chu Mizoram Sawrkar a lungawilo hle tih sawiin, Sawrkar chu a tawlh dawn lo a, khawng takin a kal dawn tih an sawi a ni. He thutkhawm-a an thurel angin, ramri chungchang a sawrkar ngaihdan leh ruahmanna, mipuite hriat awm chu Vawiin chawhnu dar 1:00 hian Home Minister Lalchamliana'n thuthar thehdarhtute hmaah a puang dawn a. Hei bakah hian tunkar Nilaini, July ni 14 chawhma dar 11:00-ah Assembly Conference Hall-ah Chief Minister chuan ramri chungchangah Political party zawng zawngte, tlawmngai pawl te leh Kohhran hruaitute thutkhawm a neihpui dawn bawk a ni.

Hetihlai hian Mizoram Chief Secretary, Lalnunmawia Chuaungo chuan Inrinni-a Phai-nuam Buarchep hmuna thil thleng chungchanga thudik lo thehdarhah Assam sawrkar a puh. Nimin-a Additional Secretary (North East), Ministry of Home Affairs hnena lehkha a thawn ah Chief Secretary chuan ‘Mizoram lam mi misual thenkhatin Assam ramchhung lutin harsatna an siam’ ti a Assam sawrkar in thu a thehdarh chu thudiklo a ni tih tarlangin, Assam Police, Official dangte leh Assam mite hi Mizoram chhung, Buarchep-ah lutin lei laihna khawl hmangin Mizoram chhunga mimal huan-a an thil chinte an rawn nawr chhia a, kawng an rawn lai zawk a ni, a ti a. Mizo huan neitute hian Assam Official-te laka an ram humhalh na'n pal an lo siam a, chu chu Assam Police-te hian khawl hrawl pui pui hmangin an tihchhiat sak tih a sawi bawk.

Inrinni chhun khan Assam Police te tirhluh lei laihna khawl pathum chuan Phainuam Buarchep ram-a Chalchhunga phaizawl chu meter 100 vel zeta thui an rawn lai a, he thil thleng avang hian Phainuam leh Phainuam Buarchep-a chengte chuan lei laitu khawl hi an lo dan avangin lei laitute hi Assam ram chin Sanggua-ah an let a, hemi hnu hian rawn let lehin, Saihapui lui thleng an rawn lai a ni.

Saihapui lui leh Buarchep lui infinna ah ah hian Phainuam leh Phainuam Buarchep mite bakah Kolasib SP lehVairengte SDO (Civil) te chuan phaizawl laitute hi an lo dang a, hna hi chawlhsan a niin, boruak duhawmlo thleng erawh a awm zui lo nia thudawn a ni. 

Comments

Chhiar Hlawhte