Latest News

COVID-19 hri kai 456 hmuh belh leh an ni

Mizoram-ah COVID-19 hri kai hmuhchhuah an la awm belh zel a, niminpiah khan Sample 4537 enfiah niin heng atang hian hri kai 456 zet hmuhchhuah leh niin Mizoram-a hri kai hmuhchhuah zawng zawng chu 26,207 an tling ta.

Niminpiah khan ZMC-a RT-PCR Laboratory-ah Sample 1045 enfiah niin heng atang hian hri kai mi 87 hmuh an ni a, an vai hian Aizawl District-a Sample lak vek niin Veng khat atanga hri kai hmuhchhuah tamna ber, Chanmari West-ah hri kai mi 19 hmuh an ni a, heng hri kai hmuhchhuah te hi hri kai tawh nen inkawmhnaihna neih avanga inkhunghrang lai ni deuh vekin mi pahnih erawh chu hri kaina hriatloh a ni thung.

District hrang hranga TrueNat Laboratory-ah niminpiah khan Sample 299 enfiah niin hri kai mi 26 hmuhchhuah an ni a, an zinga mi 13 te chu Lunglei District ami niin an vai hian Lunglei khawpui chhung ami an ni a, Champhai leh Mamit District-ah hri kai mi 5 ve ve hmuh niin Lawngtlai District-ah pahnih leh Aizawl District-ah hri kai pakhat hmuh an ni bawk.

Mizoram hmun hrang hrangah Rapid Antigen Test hmangin niminpiah khan Sample 3193 enfiah ni bawkin hri kai 343 hmuhchhuah an ni a, heng zinga mi 183 te chu Aizawl District ami an ni. Hri kai hmuh tam zualna zingah Tuirial-ah hri kai 18 hmuh niin Bawngkawn leh Venghlui-ah 12 ve ve, Vaivakawn-ah 11 leh Chhinga Veng-ah hri kai mi 10 hmuh an ni a, hri kai hmuhchhuah zingah hian hri kaina hriatloh leh chhui zui ngai an awm nual bawk a ni. Kolasib District-ah pawh hri kai mi 62 hmuhchhuah niin an zinga 31 te chu Hortoki khua ami te an ni a, Lunglei District-ah hri kai mi 45 hmuhchhuah ni bawkin an vai hian Lunglei khawpui chhung ami vek an ni a. Mamit District-ah hri kai mi 21 hmuh an ni a, Siaha District-ah 12, Serchhip District-ah 10, Lawngtlai District-ah 8 leh Champhai leh Saitual District-ah hri kai pakhat ve ve hmuh an ni bawk.

Heti hian nimin thlenga Mizoram-a hri kai hmuhchhuah chu 26,207 an ni ta a, nimin khan hri kai mi 175 te chu enkawl dam niin nimin tlai dar 5:00 thlengin mi 20,653 te chu enkawl dam an ni tawh a, hei hi hri kai hmuhchhuah atanga chhutin zaa 78.81 niin tunah hian hri kai enkawllai 5435 an la awm mek a ni.

COVID-19 hri kai zingah mi 3 an boral leh :

Nimin khan Mizoram-ah COVID-19 hri kai zingah mi pathum boral an awm leh a, nimin zing dar 9:40 khan Lalnunthari (68), Serte, Lunglei District chu ZMC-ah boralin nimin chawhma dar 11:30 khan J. Ramthangi (74), College Veng Aizawl chu ZMC-ah a boral ve leh a, nizan dar 6:10 khan C. Chawngbuanga (74), Venghlui chu ZMC-ah a boral ve leh bawk. Heti hian Mizoram-a hri kai zingah mi 120 an boral ta a ni.

Comments

Popular News (Last 30 Days)