Bilkhawthlir-ah BHO Office hawn a ni

Serlui bialtu MLA leh Rubber & Allied Crops Development Board Vice Chairman, Lalrinsanga Ralte chuan nimin khan Bilkhawthlir-ah Block Horticulture Office (BHO) a hawng.

Bilkhawthlir-a BHO hawnna ah hian Kolasib DHO, C. Lalremsiama chuan Horticulture Department hnuaia kalphung thar duan angin Kolasib District chhungah pawh Block Horticulture Office, Bilkhawthlir bakah Thingdawl Block-ah pawh Block Office hi hawn thuai beisei a nih thu a sawi a ni.

He hunah hian Bialtu MLA, Lalrinsanga Ralte chuan Bilkhawthlir leh a chhehvel ram te chu thlai leh thei chi hrang hrang hlawkpui tham a chin theihna hmun a nih thu sawiin, mithiam ten a hmun an thutchilh theih nan Block Horticulture Office hawn a ni ta chu kut hnathawktute tan hmasawnna leh hlawhtlinna tam tak a thlen ngei a beisei thu a sawi a. Block Horticulture Office hawn thar tak chu District chhung khaw hrang hranga hmasawnna inkhuairualna thlentu hmanraw pawimawh tak ni turin duhsakna a hlan nghal bawk.

Block Horticulture Office, Bilkhawthlir hi Bilkhawthlir North VC-te ram pek a sak niin Office building, BHO Quarters leh Staff Quarters pakhat a awm a. Office building-ah hian Godown a awm tel bawk a ni. A sak nan hian cheng nuai 48 sen niin heng sum te hi NABARD leh MIDH atanga hmuh a ni.