Union Home Minister hovin NE-a CM ten hmasawnna tur hrang hrang an sawiho

Inrinni khan Union Home Minister, Amit Shah hovin India hmarchhak state Chief Minister-te chu Shillong khawpui-ah inhmukhawmin North East State tinte kaihhnawih thu pawimawh hrang hrang an sawiho a. He hunah hian Mizoram atangin Chief Minister, Zoramthanga chu telin tunhnaia ramri-a buaina chungchang a sawilang.

State Convention Centre, Shillong-a he inhmuhkhawmna ah hian Mizoram Chief Minister, Zoramthanga chuan Assam nen a ramri chungchang sawiin, he buaina hi hun rei tak atanga awm tawh, Nagaland, Meghalaya, Arunachal Pradesh leh Mizoram-in State nihna an chan tirh pawha tihfel loh, Vawiin thlenga harsatna lo awm zui ta a nih thu a sawi a. Hemi chungchangah hian Assam chu heng State dang pali hringtu a nih angin inhmuhthiamlohna te chinfelna ah rilru puitling tak pu tura a beisei thu a sawi a ni.

Assam in Constitutional Boundary anga a chhal ram zau tak chu Mizo ten kum za chuang Lo leh Leilet atan an lo hman char char tawh thu pawh Chief Minister chuan a sawi a. Assam Chief Minister nen June 29, 2021 inbiakna a May 10, 2021 anga 'Status quo maintain ni se' tia an lo sawi dun tawh chu a taka kalpui tlang ngei ni se, tiin Mizoram Chief Minister chuan ramri ah hian remna awm thuai se a duh thu leh, thenawm State pahnih te inrem taka an awm dun theih nan he Meeting hi a pawimawh thu hi a sawi bawk.

Border chungchang bakah hian Chief Minister hian tunhnaia thenawm ram Myanmar atanga raltlan lo lut chungchang sawi bawkin, an sahimna zawnga lo lut an ni chu haider mai lo turin sawrkar laipui chu a ngen a. Mizoram-in a theihtawp chhuah in riahna leh chaw ei tur pe mahse, State sum neih in a tlin vek loh avangin sawrkar laipui a inrawlh a pawimawh thu a sawi bawk.

Chief Minister hian Ministry of Home Affairs kaihhnawih thil pawimawh dangte a sawi bakah India sawrkar atanga Fund hmuh kaih-hnawih thil dangte a sawi a. Central Sponsored Scheme (CSS), Externally Aided Project (EAP), Special Central Assistance to States for Capital Expenditure, NEC leh DoNER hnuaia Budgetary Allocation hmuh danah State tê tana harsatna awm thin chu ennawn a ngaih thu a sawi-iah a. Eastern Agricultural Marketing Corporation Limited (NERAMAC) chuan Mizoram-ah Office din thuai turin leh Management Board-ah hmarchhak State tin atanga aiawh awm thei se tiin a thlen bawk.

Chief Minister hian kumin January thlaa NEC Plenary Meeting vawi 69-na neih tak atanga hmalakna tur awm hrang hrang te bawhzui theihna kawng hrang hrang Mizoram in a neih te a sawi a. State hmasawnna atan All India Services Cadre hran State in a mamawh thu a sawi bawk a. Service-a awm ten an Post-na hmunah neitu thinlung an neih a, ram hmasawnna atan theihtawp an chhuah theih nan Mizoram tan Cadre hranpa siam a tul thu a sawi tel bawk.

Meeting zawh hian Chief Minister chuan Amit Shah hnenah ‘Boundary Commission for Settlement, Delimitation and Demarcation of Boundary Between Mizoram and Assam’ din tura All Political Parties, All Non-Governmental Organizations leh Joint Action Committee, Mizoram ten Memorandum an sign, kum 2018-a Prime Minister hnena lo thehluh tawh chu a copy a pe a; Mizoram mamawh pawimawh hrang hrangte a sawipui bawk a ni.

Chief Minister Zoramthanga hi Assam Chief Minister, Himanta Biswa Sarma nen inbe bawkin, ramri chungchanga State pahnih buaina chu rang lama chinfel thuai a nih theih nan remchang hmasa ah Mizoram lo kal turin a sawm a, Assam Chief Minister pawhin a sawmna hi tihhlawhtlin ngei a tum thu in a chhang tih sawrkar thuchhuah chuan a tarlang.