Latest News

Sample Test runpui neih mek sawihona neih a ni

Nimin khan Health Minister Dr. R. Lalthangliana hovin Aizawl khawpui leh a chhehvel hmun thenkhata Sample Test runpui, Mass Testing neih mek chungchang sawihona neih a ni.

He sawihona SAD Conference Hall-a neih ah hian Dr. R. Lalthangliana chuan Total Lockdown puan chhunga Aizawl khawpui leh Mizoram hmun hrang hrangah COVID-19 hri pui inkaichhawnna chhu chat tura theihtawp chhuahna pakhat atan Sample Test runpui hi kalpui a nih thu a sawi a. “Sample Test Kit kan chah a hun taka a rawn thlen theih loh mai kan hlauh laiin Principal Consultant Wing Commdr J. Lalhmingliana’n theihtawp min chhuahpuina avangin Kolkata Airport-a Test Kit parcel 82 tang reng chu Vawiin khan parcel 75 rawn thlengin karleh Thawhlehni ah parcel 7 a rawn thleng leh dawn a, tluang takinn hma kan la chhunzawm zel thei dawn a ni,” a ti.

Wing Commdr. J. Lalhmingliana chuan tuna Delhi Airport-a Test Kit parcel 100 la tang chu Vawiin-ah Delhi-Aizawl Direct Flight, Indigo Airlines hmangin rawn phurh thlen a nih tur thu a sawi a. May thla tir atanga July 21, 2021 thlengin Thlawhtheihna vawi 58 (May - 23, June - 17, July 21 thleng - 18) a service tawh thu leh khualzin 7190 (May - 2769, June - 2488, July 21 thleng - 1993) an rawn luh tawh thu sawiin, khualzin rawn thlawk lut/haw zingah Lengpui Airport Screening Point-ah COVID-19 hri kai mi 118 (May - 97, June - 8, July 21 thleng -13) an hmuhchhuah tawh thu a sawi a. Passenger rawn lut zinga 1.64% positive an nih thu leh thlawhtheihna pakhat zelah COVID-19 positive 2.03% hmuchhuah an ni tih sawiin, tun dinhmunah chuan rawn lut lam aiin Mizoram atanga zin chhuakte hi an hlauhawm tawh zawk ang hiala ngaihtuah theih a ni, a ti a. COVID-19 dona atana hmanraw mamawhte chatlak lova rawn phurh thlen zung zung a nih theih nan kar khata Thlawhtheihna service zat tihpun a tul hle ni a ahriat thu a sawi bawk.

State Nodal Officer on COVID-19 Dr. Pachuau Lalmalsawma chuan Sample Test runpui ni hnih neih chhunga an hmalakna te tarlangin, Sample test zawng zawng SRF ID pek a, COWIN portal-ah thun vek a ngaih avangin result kimchang tarlan hian hun a duh hlek thin tih a sawi a. Sample Test runpui atana volunteers Data Entry Operator 25 leh Laboratory Technician 24 an rawihte chu Team 5-ah an then thu leh SRF ID generate zung zunga result rang taka siam turin Data Entry Operator volunteer lakbelh an la mamawh dawn tih a sawi bawk.

PM Cares hnuaia Owygen Plant 1000 lpm Central PWD in ZMC-a an bun tur chu kumin August 15 hmain peihfel a nih beisei thu he hunah hian tarlan niin, HLL inventilator 10 ZMC a an pek tur pawh a bun tur company engineer chu karleh lamah a rawn kal tur thu tarlan a ni.

Comments

Chhiar Hlawhte