Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Mizoram-a Hri kai hmuh tam ber ni thleng leh

Inrinni khan Mizoram-ah Sample 4619 enfiah atangin COVID-19 hri kai mi 938 hmuhchhuah leh an ni a, Mizoram-ah ni khat-a hri kai hmuhchhuah an tam ber tum niin Mizoram-a hri kai hmuhchhuah chu an la pung zel a ni.

Inrinni khan ZMC-a RT-PCR Laboratory-ah Sample 1719 enfiah niin heng atang hian hri kai 364 zet hmuhchhuah an ni a, hei hi ZMC-a RT-PCR Laboratory atanga ni khat-a hri kai hmuhchhuah an tam ber tum a ni bawk a, Veng mal-a hri kai hmuhchhuah mi 20 aia tamna Veng 5 awmin Chanmari West-ah 26, Thuampui leh Venghnuai-ah 25 ve ve, Electric Veng-ah 22 leh Dawrpui-ah 21 hmuh an ni a, a bak zawng hi Veng leh khua 66 ami niin Serchhip District atangin hri kai mi 2 hmuh an ni bawk a, amaherawh chu Sample lakna, Aizawl District case-ah chhiar an ni thung.

Mizoram District hrang hranga TrueNat Laboratory-ah Inrinni khan Sample 473 enfiah ni bawkin heng atang hian hri kai mi 40 hmuh an ni bawk a, heng zinga mi 20 te chu Champhai District ami niin an zinga 16 chu Zokhawthar ami an ni a, Lunglei District-ah hri kai mi 11 hmuh niin Lawngtlai District-ah 6, Siaha District-ah 2 leh Mamit District-ah hri kai pakhat hmuh an ni bawk.

Rapid Antigen Test hmanga Sample enfiah 2427 atangin hri kai 534 hmuh ni bawkin an zinga 279 te chu Aizawl District ami an ni a, Veng leh khaw hrang hrang 64 atanga hri kai hmuhchhuah niin hri kaina hriatloh leh chhui zui ngai thahnem tak an awm bawk a ni. Kolasib District atangin hri kai mi 103 hmuh an ni bawk a, Mamit District atangin mi 53, Lunglei District atangin mi 41, Lawngtlai District atangin 21, Serchhip District atangin 16, Champhai District-ah 12, Siaha District-ah 8 leh Saitual District-ah hri kai mi pakhat hmuh an ni bawk.

Mizoram-a hri kai hmuhchhuah an pun rual hian hri kai enkawl dam pawh an awm belh ve zel a, nimin khan hri kai zinga 133 te chu anmahni enkawlna hmun atanga chhuahtir leh niin heti hian nimin tlai dar 5:00 thleng khan Mizoram-a hri kai hmuhchhuah chu 32,083 an ni tawh a, heng zinga 23,371 te chu enkawl dam ni tawhin hei hi hri kai hmuh atanga chhutin za zela 72.85 a ni a, tunah hian hri kai enkawllai 8576 an la awm mek bawk a ni.

Mizoram-ah hri kai mi 135 an boral tawh :

Mizoram-a COVID-19 hri kai zingah nimin thleng khan mi 135 an boral tawh. Zirtawpni zan dar 9:40 khan Lalruatfeli (14), Bungkawn chu COVID-19 vangin a boral a, amah hi hri kai In lama enkawl a ni. Inrinni zing dar 7:00 vel khan Abdul Mateen (61), Kolasib Venglai-a khawsa mek chu COVID-19 vangin Sethawn CCC-ah a boral bawk a, a ruang hi an khua Karimganj-ah lak a ni.

Comments

Chhiar Hlawhte