Assam Police-te rawn luhna Vairengte thlangah IR Police Camp sa nghal turin hma lak a ni
Niminpiah-a Assam Police leh mipui thenkhat ten Mizoram leh Assam ramri kan-a Mizoram chin an rawn luh avanga buaina kal zelah tunhnaia Assam Police te rawn awmna Vairengte tlak lam, Aitlang zau-a Chhandama huan-ah ramri venghim turin IR Police Camp sak tan nghal tura ruahman a ni.
Niminpiah-a Assam Police leh Civil mi te Vairengte tlak lam Aitlang zau, tunhma atanga Mizoten an ram anga an lo enkawl tawh thin an rawn kala Mizo huan-a Thlam leh thlai te an tihchhiat avanga buaina kal zelah nimin khan Vairengte tlak lam Aitlang zau-a Chhandama huanah Kolasib DC Dr. H. Lalthlangliana leh Hailakandi DC, Rohan Kumar Jha te chu ramri chungchangah an inbia a, DC pahnih inbia te hian ramri chungchanga harsatna awm thin chu chinfel a nih theih nan State pahnih Chief Secretary ten thla thar July ni 9-a New Delhi-a inbiak an tum chu nghah rih phawt ni se, an ti a. Ramri-ah boruak ralmuang a awm theih nan hmasawnna hna thawk turin hmalakna thar kalpui rih loh ni se, a tu lam ve ve pawhin boruak thalo siam thei tura hmalak loh ni se, an ti bawk.
Hetianga DC pahnih ten inbiakna an neih hnu hian Vairengte Forest IB-ah Serlui bialtu MLA, Lalrinsanga Ralte hovin ramri venhim dan tur chungchang sawihona neih zui nghal a ni a, he hunah hian Kolasib DC Dr. H. Lalthlangliana; SP Vanlalfaka Ralte; Vairengte SDO (C) Isaac C. Lalrempuia leh Vairengte khawtlang hruaitute an tel a. He hunah hian bialtu MLA chuan buaina rawn thlen hnua Vairengte mipuite hmalak dan chu lawmawm a tih thu sawiin, tun dinhmun ah ramri ah la tawlh loh thu leh tûnah hian sipai thahnem takin an thutchilh tawh thu a sawi bawk.
He hunah ramri venhimna kawnga hma an lak dan tur hrang hrang sawiho niin tunhnaia Assam Police te rawn awmna, Vairengte tlak lam Aitlang zau-a Chhandama huan-ah ramri venghim turin nimin tlai atang khan IR Police Camp sak tan nghal nise an ti ni.
Ramri-a hetiang boruak a awm avang hian bialtu MLA leh DIG, Lalbiakthanga Khiangte te chuan Vairengte hi an thutchilh mek a ni.
Comments
Post a Comment