Latest News

Serchhip bialtu MLA in Serchhip bial mipuite COVID-19 vaccine lak uar turin a chah

Serchhip bialtu MLA, Lalduhoma chuan Serchhip bial mipuite chu COVID-19 vaccine lak uar tura chahin, bial mipui ten hri leng avanga harsatna kan tawh lohna turin theihtawp kan chhuah ho zel tur thu a sawi bawk.


Nimin-a Serchhip a rawn tlawhna a thuthar thehdarhtu thenkhat ten an kawmna ah Serchhip bialtu MLA, Lalduhoma chuan Serchhip Bial bik chu hri leng avangin tlem lai khan kan mangang viau tih sawiin, kan DC hovin kan theih ang anga hma lain thawktute inpekna a san avangin tunah chuan kan ziaawm chhoh tak thu leh lawmawm a tih thu a sawi a. Tunah hian Delta Variant a rawn awm leh tih sawiin, inkaichhawn awlsam lehzual a nih avangin Vaccine la uar turin mipuite chu a chah a. “Kan vai hian vaccine la ilang chuan kan ziaawm ang tih ka beisei a, bial mipui ten harsatna kan tawh lohna turin theihtawp kan chhuah ho zel ang chu,” tiin vaccine la te chuan an vei nawn leh a nih pawhin an ziaawm deuh hlek tih a sawi bawk.

COVID-19 hri leng hluar zel chungchangah Serchhip Bialtu MLA chuan chhan pathum lian tak tak a awm thu a sawi a. Pakhat-ah chuan test chungchang a nih thu leh Test runpui neih tur a ni tih sawiin, “Mizoram-ah mihring kan tlem a, mihring tam zawkna ah pawh an ti thei a nih chuan ti thei ve tur kan ni,” tiin Test ngai chin chu kan tam lutuk lo tih a sawi a. Hri kai hmuhchhuah an tam chuan enkawl senloh an hlauh avangin Random Testing pawh tihtawpin tunah hian a rah kan seng ta niin a sawi a. “Test a chakloh chuan hri vei si, vei tih in hre lo nen kan awmkhawm ta a, chung ho nen chuan a thla-a thla min lockdown khum ta a,” tiin hri kai te nen min lockdown avangin lockdown chung pawhin hri a kiang theilo niin a sawi bawk.

Pahnihna ah chuan Central Guideline-ah chuan Test zawng zawng atanga zaa 70 chu RT-PCR khawl-a Test tur a nih thu leh keini-ah chuan RT-PCR khawl-a Test-na chu hmun khat ah chiah tun thlenga kan la neih thu Lalduhoma chuan a sawi a. A dang a tam zawk chu RAgT hman a nih thu leh RAgT-a result chu a zatve dik-a a zatve diklo tih chu khawvel in a pawm a nih thu sawiin, Zuangtui TNT Camp-a hri len dan tur entirna pakhat a nih thu a sawi a. Chu khawl chu kan sawrkar in rinrawl-ah a neih tlat avangin hri hi a darh nasa niin a sawi.

A pathumna ah chuan Central sawrkar in State zawng zawngte an budget atanga Department tinin zaa 20-a titlem-a Covid venna atana hmang tura tiin kan sawrkar in a zawmlo niin Lalduhoma chuan a sawi a. Kan budget chu hripui leng kara siam a ni chungin Health Department chuan vbc. za telin nikum a phak ta lo nia sawiin, sawrkar-ah Budget Re-Appropriation a ngai an ti chungin sawrkar in a ti duhlo niin a sawi a. Chumi ah chuan hma kan lak loh avangin sum ah harsatna a awm ta nia sawiin, thawktu leh khawl te pawh kan neih belh theihlo niin a sawi a, tihdam rate (recovery rate) chhe ber kan nih thu a sawi bawk.

Comments

Chhiar Hlawhte