Chanchin thar thenkhat :

MLA in tuilakna hmun tlawh

Dampa bialtu MLA leh Deputy Chief Whip Lalrintluanga Sailo chuan Inrinni khan a bial chhung Reiek tana PHE Department hmalakna, Feeding and Pumping Water Supply Scheme for Reiek chu a hmunah tlawhin thawktute nen inkawmna an nei a. Reiek leh a chhehvel khua tui harsatna sukiang tura PHE Department hmalakna chu lawmawm a tih thu sawiin, Tlawng lui tui an pump thleng ta chu hmasawnna ropui tak nia a hriat thu a sawi bawk. Feeding and Pumping Water Supply Scheme for Reiek hi Dihmunzawl atanga lak niin Rs. 12,96,62,510 senga siam a ni a, Reiek Tlang-ah Tuizem lian dahin mi 3519 chawm thei tura ruahman a ni.

Khawl bunna tur lai zo tawh

Mizoram sawrkar in Lunglei Civil Hospital-a RT-PCR khawl dahna tura hma a lakna kal zelah Laboratory Building sakna tura ram a laih chu zawhfel a ni ta a, helai hmunah hian 100 X 50ft a zau in building sak tura ruahman a ni a, chhawng 5-a sak tura ruahman niin building sakna tur hian Tlang an rawt avang hian Doctor quarters pahnih chu thiah a ni. Contractor hi K.T. Nghawra, Zohnuai, Lunglei niin Building sakna tur hian Mizoram sawrkar chuan NEC-ah cheng nuai 780 vel a dil a, hei hi sawrkar lam hian an la hmu lo thung. Hethlai hian RT-PCR bun a nih theihna tura Gauhati High Court-a PIL thehluh chu Vawiin hi ngaihtuah leh hun tura ruahman a ni.

Inkaihhruaina ti danglam

Mizoram sawrkar in hri leng avanga inkaih-hruaina a siam thenkhat chu Gauhati High Court in thuchhuah a siam avangin tih danglam a ni a. Heng zingah hian hnathawh theih thenkhat ah Vaccine la tawh te tan chauha thawh theih te chu tih danglam niin Vaccination chungchangah mipui vantlang kan lo him zawk nan COVID-19 vaccine la la lo zawng zawng te chu Sawr-kar-in a thlawna vaccine lakna a ruat ah te a hma thei ang bera vaccine la tura ngen leh beisei an ni tih tarlan tel a ni bawk.

ZPM in ramri ngaihven reng

ZPM Party chuan tunlaia Assam nen ramri a buaina kan tawh mek chungchang chu an beng-khawn in an ngaihven reng tih thuchhuah siama tarlangin, Chief Minister-in ramri chinfel dan thuruk a hriat thu chiang takin mipui hriat ah a sawi tawh a, chu a thuruk hriat chu a puan chhuah hma leh, a taka a chantir hma chuan ramri chinfel kawngah hma lo lak khalh chi ah an ngaih loh thu sawiin, ramri venghimtute harsatna tawh ngaihvena thuamtha tura sawrkar an phut thu an sawi bawk.

PC Party in sawrkar an phut

PC Party chuan Assam mi ten pawisakna nei miah lova Phainuam ram Mizoram chhung (Buarchep) phai-a JCB hmanga kawng siam tuma hma an rawn la leh ngawt mai chu hriat-thiam har an tih thu thuchhuah siama tarlangin, a rang thei ang bera Assam mite nawrkir tura Mizoram sawrkar an phut thu an sawi a. Chief Minister chu kan ram leilung leh Mizote thlavang hauh tura a rang thei ang bera chechhuak tura an phut thu pawh an sawi bawk.