Latest News

Chanchin thar thenkhat :

Ruihhlo hmansual vangin 33 thi

Kumin kumtir atanga July ni 16,2021 thleng khan Mizoram-ah ruihhlo hmansual vanga thi mi 33 an awm tawh. Excise & Narcotics Department chhinchhiah danin kumin chhunga ruihhlo hmansual vanga thi 33 zinga 30 hi mipa niin midang 3 hi hmeichhia an ni a. Ruihhlo hmangsualtu te hian Heroin chu an hmang tlanglawn ber a ni. END chhinchhiah danin Mizoram-ah ruihhlo hmansual vanga thi 1679 an awm tawh a, an zinga 1483 hi mipa niin midang 196 chu hmeichhia an ni.

Excise & Narcotics Department hian kumin chhung hian June thla tawp thleng khan Heroin kg 9.7, Ganja kg 101.6 leh Methamphetamine kg 6.9 an man tawh a. Ruihhlo phurh nana hman lirthei Two Wheeler 15, LMV 27 leh HMV 1 aan man tawh bawk a. Kumin chhungin sawrkarah chhiah Rs. 39,44,483.00 an chhunglut tawh bawk.


NEC sum-a hnathawh tur thlir

Sawrkar laipuiin India Hmarchhaka hmun kilkhawr leh hnam tlem zawkte tana North-Eastern Council (NEC) budget pumpui atanga 30% a dahhran atanga kum 2021-22 atana Lawngtlai District chhunga Lai hnam (Lai community) te hmasawn nana sum lo kal hman dan tur ngaih-tuahin Zirtawpni khan Lawngtlai-ah District Bawrhsap, Dr. Andrew H. Vanlaldika hovin Lawngtlai District Level Committee chu an thukhawm a. He hunah hian kum 2021-2022 atana sum lo kal cheng nuai 500 hman dan tur relin Rural Housing Sector-ah nuai 130 ruahman a ni a, Livelihood Sector-ah nuai 270 ruahman a ni bawk a, School Education Sector-ah nuai 50 ruahman a nih bakah Sports Sector-ah nuai 50 ruahman a ni bawk a, July 23, 2021 hmain DPR hi NEC-ah thehluh a ngai dawn a ni.


BJP ten bungrua sem zel

BJP Mizoram Pradesh chuan Covid hripui dona atana hmanraw pawimawh, SEWA International leh IBC atanga Covid dona hmanrua a dawn, Oxygen Concetrator, PPE Kits leh Health & Hygiene Kits bakah ei leh in tur te chu Inrinni khan Mamit District-a Langkaih Group YMA, Taitesena Group YMA leh W. Phaileng-ah te an President, Vanlalhmuaka hovin an hlan a, hemi hmalam hian khaw thenkhat ah pawh an lo hlan tawh a ni.


PC Party in sawrkar phut

PC Party chuan hripui avanga AMC huam-chhungah hripui avanga Total Lockdown puan chhunzawm a la ngai fo mai chu pawi an tih thu sawiin, Hetianga kar hnih chhung Total Lockdown chhunzawm leh tura ruahmanna siam a nih lai hian, nitin eichawp zawngte din-hmun tur hriatthiam saka, an ei leh bar tur te pawh Task Force te kaltlanga pe ngei turin Mizoram sawrkar an phut thu an sawi bawk.


Governor thar lalut dawn

Mizoram Governor 22-na atana ruat, Dr. Kambhampati Hari Babu chuan Vawiin hian Mizo-ram a rawn lut dawn a, tlai dar 4:30-ah Raj Bhavan-ah rinawmna thu tiam tirin lakluh a ni ang. Larsap thar lakluhna hunah hian hri leng avangin Minister te bakah Political Party leh pawl aiawh pakhat zel chauh sawm an ni dawn a ni.


AMC-ah Mass Testing nei dawn

Aizawl khawpui-a inkharkhip chhunga Sample Test runpui (Mass Testing) neih tura thawktu tur lak tharte tan nimin khan an hnathawh dan tur chungchang inzirtirna chu DHS Conference Hall-ah neih a ni a, Mass Testing atan hian Sample la tur Laboratory Technician leh report buatsaihtu tur, Data Entry Operator (DEO) mi 50 vel tel tura ruahman a ni.


State Level-a Committee din turin sawrkar ngen

Joint Action Committee on Inner Line Reserve Forest Demand (JAC on ILRFD) OB Meeting chuan Mizoram Sawrkar in District Level Inter-State Border Management Boards Kolasib leh Mamit District te tana dinna tur tun thla ni 13-a a tichhuak te chu a rang lama ennawnin District pahnih tan a hrana Board din lovin State Level, Committee pakhat hnuaiah Dy. CM emaw, Home Minister emaw kaihhruai tur ngeia siam tha turin sawrkar an ngen a, a enkawlna tur sum pawh a hranpa a dah an duh thu an sawi bawk. Hei bakah hian Assam in kan ram min lo chuhpuina avanga tul leh thu pawimawh hrang hrang sawiho tura All NGO & All Political Party Joint Meeting Mizoram sawrkar in a buatsaih chu lawmawm an tih thu an sawi bawk.

Comments

Chhiar Hlawhte