Latest News

Chanchin thar thenkhat :

Mizoram Governor tur ruat

Mizoram Governor thar atan Dr. Hari Babu Kambhampati chu ruat niin he hna chelh mektu PS. Sreedharan Pillai chu a thlak ang. Nimin khan India President chuan State thenkhat a Governor tur hi a ruat thar a, hemi ang hian Mizoram Governor nilai PS. Sreedharan Pillai chu Goa State Governor tura sawn niin a aiawh tur hian Dr. Hari Babu Kambhampati hi ruat a ni. Mizo-ram Governor thar tur hi kum 68-a upa niin BJP ah Andra Pradesh State Unit President hna a lo chelh tawh a, kum 2014 General Election-ah khan BJP Ticket-in Visakhapatnam bial atangin Lok sabha MP atan thlantlin a ni tawh bawk a, an State-ah MLA atan thlantlin a lo ni tawh bawk a ni.


Champhai South bial fang

Champhai South bialtu MLA leh Law & Judicial Minister, TJ. Lalnuntluanga chuan nimin khan a bial chhunga COVID-19 hripui do kawnga Indo-Myanmar ramri veng-a rammu VLTF duty post hrang hrang- Melbuk-ah 2, Zokhawthar-ah 4, Ruantlang-ah 2 leh Tlangsam-ah 2, a vaiin Duty post 10 a tlawh a, COVID-19 hri leng leh Vawk hri leng mek atana an mamawh bungrua leh pawisafai te a hlan nghal bawk. Champhai South bialtu MLA hian HSLC & HSSLC Exam result chhuaka zirlai hlawhtling, Melbuk-ah 14 leh Zokhawthar-ah 55, an vaiin mi 69 te tan lawm-puina thilpek a hlan nghal bawk a ni.


Online Art Workshop nei tan

Mizoram sawrkar-a Information & Public Relations Department bultumin nimin khan Mizo-ram Art Development Society (MADS) chuan ni 4 chhung awh tur Online Art Workshop chu an buatsaih tan a. July ni 9 thlenga awh tur Online Workshop-ah hian Mizoram hmun hrang hrang leh ram pawn-a MADS member Artist mi 60 leh Associate member mi 14, an vaiin mi 74 an tel a ni. He hun hman chhung hian mahni Inlum atangin lemziak leh lemtuk hmangin artist ten ni 4 chhungin an veizawng an chher dawn a ni.


ZPM Thalai in sawrkar phut

ZPM Thalaite chuan Vairêngte Joint VC kaih-hruainaa Border Defence Force din tur chu an thlawp thu nimin khan thuchhuah siama tarlangin, hei hi sawrkâr chakloh zia chiang taka pholanna nia an hriat thu leh Vairengte mipui hmalakna hian sawrkar chu kai harh se an duh hle tih an sawi a. July 8, 2019-a Council of Minister thukhawmin, Bengal Eastern Frontier Regulations, 1873 (Regulation 1 of 1873) Section 2 tlawhchhana siam Cachar Inner Line, 1875 chu Mizoram leh Assam ramri a nih thu an nemngheh chu ah an dingnghet a ni tih lantir nan Mizoram sawrkar chu Cachar Inner Line 1875 lanna Mizoram Map thar buatsaiha tlangzarh vat tura an phut thu an sawi bawk.


BJP ten thilpek an sem

BJP Mizoram Pradesh President, Van-lalhmuaka chuan nimin khan West Phaileng VLTF duty te tlawhin, Oxygen Concentrator, Sanitiser, Face Mask, Steamer, PPE kit 20, Buhfai bag 6, Dâl bag leh Alu bag-te a hlan a, West Phaileng VC leh VLTF te chuan lawmthu an sawi bawk. He hunah hian BJP President chuan Central sawrkarin hmun hrang hranga COVID-19 Vaccine pek dante enfiah tura an tih angin theih ang anga Vaccine pek dante pawh enfiah a nih tawh thu sawiin, India ramah Covid Vaccine pek runpui chu chak taka kalpui mek anih angin Mizoram mipui, Vaccine la thei chin te chu vaccine la vek turin a ngen bawk.


Mizoram District tinah ASF hmuh a ni tawh

Vawk pul hri, African Swine Fever (ASF) chuan Mizoram District zawng zawng a tuamchhuak ta a,hun rei tak Kolasib District-ah ASF hmuh a nih loh hnuah Vairengte-ah ASF vanga Vawk thi pakhat a awm tak avangin District tinah ASF vanga Vawk thi a awm ta a ni. Nimin khan Mizoram-ah ASF vanga Vawk thi 280 awm belh lehin heti hian Mizoram-ah ASF vangin Vawk 9,859 zet a thi tawh a, ASF nia rinhlelh la finfiah loh Vawk thi 604 a awm tawh bawk a ni.

Comments

Chhiar Hlawhte