Latest News

Assam leh Mizoram ramri chungchangah Home Minister in thuthar thehdarhtute a kawm

Home Minister, Lalchamliana chuan nimin khan a Pisa-ah thuthar thehdarhtute kawmin Assam leh Mizoram ramri buai chungchangah loh theihloh thilah lo chuan inkah loh hram chu an duhdan a ni tih sawiin, “Inkah hi kan tlin (afford) in kan hre lo a, amaherawh chu a tul a nih chuan kan inkap ang,” a ti.

Nimin-a thuthar thehdarhtute a kawmna ah hian Home Minister chuan Mizoram leh Assam hian ramri KM 160 chuang zet a sei kan nei tih sawiin, “Kan hriat theuh angin, Mizoram leh Assam ramri buaina hian kum tam tak a awh tawh a, District Council leh UT hunlai atang tawhin Vawiin thleng hian buaina neuh neuh kan nei reng thin. Hei hi tun thleng hian chinfel loh a la ni,” a ti a. Tunhnaia buaina chungchangah Thal thlah hmasatu nih tha a tih loh thu leh a tul ang zela hma la turin sawrkar a inpeih thu a sawi a. 1875 ramri humhalh tak tak tura hmalakna chungchangah Cabinet maia pass a nih loh thu leh Assembly House-ah rorellai leh eptu party te'n lungrual taka Mizoram ramri china an pawm dan a nih thu a sawi a. “Amaherawh chu, a taka hlenchhuak tura hmalak hi a har khawp a, tun thleng hi chuan a thuin hmalak reng a ni,” a ti bawk.

Kum 1875 ramri behchhana Court-a ramri thubuai thehluh chungchang zawhna chhangin Home Minister chuan, “Ngaihtuahna pakhatah a awm mek a ni. Chu'ng chungchang te leh ramri avanga thil dang a nghawng awm thei zawng zawngte hi All-Party Meeting-ah pawh sawiho turah ka ngai a. Tha an tih chuan 'Court-ah i kal ang u' tih te pawh an rel thei,” a ti a. Kum 1875 ramri anga Mizoram State Map Official-a siam hi tul a tih leh tih loh zawhna chu, “State sawrkar hian ama thuin Map a siam thei lovin kan hria a, recognise Map India-a siam theitu hi chu Survey of India chiah hi an ni a, a tul leh tul loh chu thudang ni ta se,” tiin a chhang bawk.

Home Minister Lalchamliana chuan, Aitlang leh Buarchep ram-a Mizote huan-a Assam ho am inkulhna chu a theih chin chinah lak let an tum thu a sawi a. Buarchep-a Chalchhunga huan-a thlai te tichhiain Assam lamin hma an rawn lak chungchangah, mihring eizawnna in tihchhiat sak chu a vanduaithlakin a inzahloh thlak an tih thu sawiin, “A awm tawk Compensation pe turin Assam sawrkar hi kan phut a ni,” tiin, hei hi a hlawhtlin theih nan Mizoram sawrkar pawhin theihtawp chhuaha a bawhzui tur thu a sawi.

Ramri buai avanga eng eng emaw harsatna a lo awm a nih pawhin mipuite tuarchhel taka awm tura chahin Home Minister chuan, ramri buaina chu politics-a hamthatna lak tumna chi a nih loh thu leh lungrual taka hmalak hona chi a nih zawk thu a sawi a, “Hnam anga kan tanrualna tur chi a ni,” a ti. Ramri venghima mipuite thlamuan turin Mizoram Police te a hmunah thahnem tak an awm mek tih pawh sawiin, a awmsa te a tul anga tichak tur leh pui turin tunah hian theih anga tam thawn belh an nih thu leh a tul dan a zirin a dangte pawh inralring tura tih an nih thu a sawi bawk.

Home Minister tawiawmtu zing a mi Serlui bialtu MLA, Lalrinsanga Ralte chuan, ramri buai chungchanga a bial chhunga buaina thlengah Vawiin thlengin harsatna leh mamawhte Home Minister hnenah direct-a a thlenin tihhlawhtlin loh a neih loh thu a sawi a. “Home Minister leh Home Secretary te chuan ngawi reng chungin thil tha an ti a. Kan Home Minister hi au au ta se, a mawi ang em tih lai zawk kha a ni. Chuvangin, ramri issue-ah kan kal dan a fuh a ni tih ka sawi duh a ni,” a ti bawk.

Nimin-a thuthar thehdarhtute a kawmna ah hian Home Minister hi Information & Public Relations Minister Lalruatkima, School Education Minister Lalchhandama Ralte, Serlui bialtu MLA Lalrinsanga Ralte, Home Secretary Lalbiaksangi leh IGP John Neihlaia ten an tawiawm a ni.

Comments

Chhiar Hlawhte