Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Kolasib DC in ramri-a buaina thlenga nunna chan leh hliam an awm pawi a tih thu a sawi

Kolasib District Bawrhsap Dr. H. Lalthlangliana chuan Vairengte-a silai hmehpuah chu Assam Police-ten tihloh theih loh dinhmun a an nawrna vang a nih thu leh he thil thleng avanga nunna chan leh hliam an awm chu pawi a tih thu a sawi.

Tun thla ni 26-a Vairengte IR Post-a Assam Police leh Mizoram Police-te innawrna chungchang leh ramri-a invenhimna kalpui chhunzawm dan chungchanga nimin-a a Pisa-a thuthar thehdarhtute a kawmna ah he thu hi sawiin Kolasib District Bawrhsap chuan he thil thleng ah hian chan tha zawk chang kan ni anih pawhin nunna hial channa thil thleng chu chapopui lova, mitthi chhungte ngaihtuah tel chunga kan chetzia leh tawngka ah te inngaihtlawmna leh lainatna tilan a pawimawh thu a sawi bawk.

Kolasib District Bawrhsap chuan ramri-a buaina thleng a nih avangin tun hun hi inpuah-chahna tha zawka kalpui hunlai tak a nih thu sawiin, nimin zing khan ramri hrul a Mizoram Police duty-te tlawhchhuakin endikna leh inthlahdah lo tura infuihtharna a neihpui thu a sawi a. “Tawlhlet kan tum lova, kan Police-te huaisen zia hi rampum hriat ah pholan mek niin hmingthatna pawh kan chang mek a ni,” a ti a, “Hmingchhe thiang kan ni tawh lova, tuna kan hmingthatna venghim tur hian theihtawpa tan kan lak a ngai a ni,” a ti.

Ramri veng tura Police duty-te dinhmun tiderthawng thei zawnga thlalak leh Video thehdarh awm lo turin mitin inchah a pawimawh thu pawh Kolasib District Bawrhsap chuan sawiin, heng te avang hian ruahmanna a hlawhchham phah theih thu a sawi bawk a. Inkahna thleng avanga Assam ramri hrula khua awmten lirthei dangin Rel kawng thlenga dan tum a hma an la ni a hriat a nih thu sawiin, heng buaina te hi chinfel tum mek a nih rualin nitin mamawh lakkhawm kawngah midangte ngaihtuah tel chunga khawsak thiam a tul thu a sawi a. Ramri venhim hna tha zawk a kalpui a nih theih nan mipuite chu tlawh tam rih lo turin Bawrhsap chuan a ngen nghal bawk a ni.

Comments

Chhiar Hlawhte