Latest News

Mizoram-ah COVID-19 hri kai 725 hmuh belh an ni

Niminpiah khan Mizoram-ah Sample 4530 enfiah leh niin heng atang hian COVID-19 hri kai 725 zet hmuhchhuah leh an ni a, Mizoram-a hri kai hmuhchhuah chu sing thum an tling dawn hnai tawh a ni.

Niminpiah khan ZMC-a RT-PCR Laboratory-ah Sample 1389 enfiah leh niin heng atang hian COVID-19 hri kai 44 hmuh leh an ni a, an vai hian Aizawl District-a Sample lak vek an ni. Hri kai hmuhchhuah thar zingah hian Veng khat atanga hri kai hmuhchhuah tam lutuk awm lovin hri kai hmuh tamna ber Vaitin khua atangin hri kai mi 7 hmuh an ni a, a bak te hi AMC huamchhung Veng 15 atanga hri kai hmuhchhuah te an ni.

District hrang hranga TrueNat Laboratory-ah niminpiah khan Sample 350 enfiah ni bawkin heng atang hian hri kai 34 hmuh an ni bawk a, an zinga 23 te chu Lunglei District atanga hri kai hmuhchhuah niin an vai hian Lunglei khawpui chhung ami an ni a. Siaha District-ah hri kai mi 4 hmuh niin Kolasib leh Lawngtlai District-ah 3 ve ve leh Aizawl District-ah hri kai pakhat hmuh an ni bawk.

Rapid Antigen Test hmangin niminpiah khan Sample 2791 enfiah niin heng atang hian hri kai 647 zet hmuh an ni thung a, an zinga 416 te hi Aizawl District-a hri kai hmuhchhuah an ni. Hri kai hmuh tamna ber Baktawng Tlangnuam-ah hri kai 62 hmuh an ni a, Bethlehem Vengthlang-ah 38, Armed Veng South-ah 33, Chhinga Veng-ah 21 hmuh an ni bawk. Kolasib District-ah pawh hrik ai 113 zet hmuhchhuah an awm a, Hortoki atangin hri kai 54 zet hmuhchhuah an ni a. Lunglei District-ah hri kai 49 hmuhchhuah niin Mamit District-ah 23 hmuhchhuah an ni bawk a, Lawngtlai District-ah hri kai 22 hmuhchhuah ni bawkin Siaha District-ah 12 leh Serchhip District-ah hri kai mi 2 hmuh an ni bawk.

Mizoram-a COVID-19 hri kai hmuhchhuah chuan sing thum tling dawn hnaiin nimin thleng khan hri kai 29,020 hmuhchhuah an ni tawh a, nimin khan hri kai mi 170 te chu enkawl dam ni ve leh bawkin heti hian nimin tlai dar 5:00 thlenga Mizoram-a hri kai enkawl dam chu 22,231 an ni tawh a, hei hi hri kai hmuhchhuah atanga chhutin zaa 76.61 niin tunah hian hri kai enkawllai 6662 an la awm mek a ni.

COVID-19 hri kai zingah mi 127 an boral tawh :

Mizoram-a COVID-19 hri kai zingah mi 127 zet an boral tawh. Nizan hmasa dar 8:10 khan Lalfima (73), Venghlui Aizawl chu ZMC-ah COVID-19 vangin a boral leh a, nimin zing dar 9:50 khan Lalbeiseia (71), Vairengte chu COVID-19 vang bawkin ZMC-ah hian a boral leh bawk a ni. Heti hian nimin thleng khan Mizoram-a COVID-19 hri kai zingah mi 127 lai an boral tawh a, tun thla chhungin mi 34 zet boral an awm tawh bawk a. Tun thla ni 7 atang khan nitin boral an la awm ziah a ni.

Comments

Chhiar Hlawhte