P&E Veng MHIP in zirlai titha an lawmpui

Kumin a Higher Secondary School Leaving Certificate (HSSLC) Exam result chhuaka Commerce Subject-a Mizoram puma pakhatna, C. Lalrintluangi lawmpuina hun chu nimin khan P&E Veng MHIP huaihawtin neih a ni.

Zirlai ti tha lawmpuina hun P&E Veng VC Hall-a neih hi MHIP P&E Veng Branch President, Angela Marhmingliani chuan kaihruaiin he hun hi MHIP Day lo thleng tur puala an buatsaih a nih thu a sawi a, Mizoram puma titha ber nihna hauhtu, C. Lalrintluangi chu an chhungin an lawmpui tih sawiin, hri leng avanga mi tam tak punkhawm ala remchan loh avanga sawm bik tlemte te nen he hun hi an buatsaih thu leh C. Lalrintluangi’n hlawhtlinna a chan theihna tura a zirna, Oikos HSS-a zirtirtute chungah lawmthu a sawi bawk.

Nimin-a he hun hmanna ah hian MHIP P&E Veng Branch hian C. Lalrintluangi lawmpuina leh chawimawina atan thuziak leh pawisafai an hlan a, he hunah hian P&E Veng VC aiawhin Vice President, F. Lalhmangaiha leh YMA aiawhin Branch YMA President, C. Lalhmangaihzuala te pawhin lawmpuina thu sawiin, thilpek an hlan bawk a. Mizoram pum-a Commerce Subject-a titha ber, C. Lalrintluangi pawhin a hlawhtlinna an lawmpui chu a lawm thu sawiin, hlawhtlinna sang zawk chang tura theihtawp chhuah chhunzawm zel a tum thu a sawi bawk.