Chanchin thar thenkhat :

Bill siam cancel leh phut

Mizoram Consumers Union (MCU) General Hqrs. chuan Power & Electricity Department-in June thla Electric Bill Metre Reading ti lova a hma thla thum - March, April, May thla Bill base-a hmanga bill an siam chu mipui zahlohna lian tak a ni tih thuchhuah siamin an tarlang a. PHE, Cable TV leh In tin luh ngai midang pawn chhungkaw tinin kan hman zat dik tak hriatna Meter Read thlapa Bill an siam theih laia P&E Department in an ti thei lo bik chu hriatthiam har an tih thu sawiin, “Mipuiten kan Bill dik tak kan pek theih nan tuna Bill siam hi Cancel a Mizoram pumah Meter Read thlap a Bill siam turin kan ngen a ni,” an ti bawk.

Harsatna thleng awm rihlo

Tunhnaia Mizoram leh Assam ramri vela buaina thleng avanga Vairengte awmchilh mektu Mizoram DIG (NR), Lalbiakthanga Khiangte chuan tun dinhmunah hmun hrang hrangah harsatna a awmloh thu leh Mizoram Police lam pawh an awmna te thuamthat mek zel anih thu a sawi a. Ramri buaina avanga Assam lamin kawngpui dan an tum ni awma thuthang chu Offical lamin engmah an hriat loh thu sawiin, ramri hnaih-a awm State pahnih Police te pawh an awmna ngai ah an la awm ve ve thu a sawi bawk.

Inremna ziak thei ta

Tunhnaia Hnahthial khua-a buhfai phurtu Truck khalhtu leh VLTF Duty te inkara inhmuh-thiamlohna thleng chungchangah nimin khan Food, Civil Supplies & Consumer Affairs Director, Ramdinliani kaihhruaiin a Pisa-ah Mizoram Truck Drivers Association (MTDA) leh Village Level Task Force, Hnahthial North-I te chuan inbiakna neiin inremna an siam a. Ngaihdam tul a ngaihna laiah an in ngaihdam tawn thu ziaka dahin, tunhnuah hetiang thil duhawm lo hi a thlen tawh lohna tura hmalak ho rem tiin he buaina thleng avanga MTDA in Hnahthial-a buhfai leh thildang phurh an chawlhsan chu nimin atang khan chhunzawm leh turin an ti bawk a ni.

Luah chin ram chan pawi ti

ZPM Thalaite chuan Mizoram leh Assam ramri chu vawilehkhata chinfel duak theih turah an ngailo tih thuchhuah siama tarlangin, kan luah ram chinte chhuhsak kan ni zel mai chu pawi an tih thu an sawi a. Mizoram Home Minister chu kan ram humhalh tura huai taka a chet phawt chuan an tanrualpui zel dawn tih sawiin, “Ni 12.7.2021-a Home Minister-in Press Conference-a a thusawi ah, Mizoram leh Assam ramri atân 1875 version Assembly House-a pass anga a sawi kha a dik lo a, Cabinet Meeting pass zawk a nih avangin tihdikna siam turin kan ngen a ni,” an ti bawk.

ASF vangin Vawk thi tam

Vawk pul hri African Swine Fever (ASF) vangin nimin khan Mizoram hmun hrang hrang ah Vawk 315 thi lehin heng te nen hian Mizoram-ah ASF vangin Vawk 12,887 a thi tawh a, nimin khan AH&Vety Department hriatpuina in Vawk 123 suat leh niin Vawk suat tawh zawng zawng chu 3024 a ni. Hetihlai hian nimin khan chhan hriatloha Vawk thi 114 zet Mizoram-ah a awm leh bawk a, Mizoram District 11-a khua leh Veng 174 te chu ASF Infected Area a puan ni tawhin, African Swine Fever lenna rinhleh Ceng leh khua 90 a awm mek bawk.