Latest News

Home Minister in Assam leh Mizoram ramri tlawhin hmun thenkhat ah Police dah belh zel an ni

Niminpiah lama Assam Police-ten Mizoram ramri-a IR Duty-na hnehchhuh an tumna hmun, Vairengte Auto Rickshaw Stand bul chu nimin khan Home Minister, Lalchamliana chuan a hmunah a tlawh a. Assam Police rawn luh tumna hmun thenkhatah Mizoram Police a tul anga dah zel an nih thu a sawi bawk.

Home Minister Lalchamliana hian nimin zing khan Aizawl atanga Vairengte hi panin Vairengte Auto Rickshaw Stand bul a tlawhna ah hian ramri buaina chu tharum tel lova chinfel tum mek laiin Assam Police-te chetna avangin lohtheih lova tharum nen chhanlet a ngaih phah tak thu a sawi a, Assam lamah nunna hial chan an awm phah chu pawi a tih thu a sawi bawk. Home Minister chuan Assam Police rawn luh tumna hmun thenkhat Saihapui ‘V’, Aitlang leh Zophai-ah te chuan Mizoram Police a tul anga dah zel an nih thu leh Saihapui ’V’ khawtlang hruaituten nimin-a an lo thlen angin Police dah belh nghal a nih thu a sawi a. Ramri buaina chungchangah Vairengte khawtlang mipuite inpekna leh huaisenna chu fakawm a tih thu a sawi bawk.

Ramri a ralmuanna a awm theih nana CRPF dah ten Mizoram lo lut a IR Camp luahlan tum Assam Police-te chetna lakah hmalakna hmuh tur a awm loh thu he hunah hian sawi niin, hemi chungchangah hian Sarbjit Singh, IG, CRPF pawh hma la tura hrilh nghal a ni bawk.

He hunah hian Supply Minister K. Lalrinliana chuan Assam nen a ramri buaina avangin ei leh bar, LPG leh POL-a harsatna a awm loh nan ruahmanna hrang hrang a awm thu a sawi a, Mizoram Sawrkar Godown-ah mipui thla hnih ei daih awm mek tur a ngaih a nih thu a sawi bawk.

Home Minister leh a tawiawmtu Minister leh MLA-te hian ramri buaina chungchang a a tul apiang a hman turin Vairengte khawtlang hruaitute hnenah sumfai an hlan a, Sports Minister Robert Romawia Royte chuan silpaulin bundle khat a hlan nghal bawk a ni.

Nimin a helai hmun tlawhna ah hian Minister- K. Lalrinliana, Lalruatkima, Lalchhan-dama Ralte leh Robert Romawia Royte, MLA 3 leh Police hotute an tel bawk a ni.

Comments

Popular News (Last 30 Days)