CLP in Relief Programme liantham duangchhuak turin Mizoram sawrkar an phut tih an sawi

Congress Legislature Party (CLP) chuan Total Lockdown avanga eizawnna kawnga talbuai te, dinhmun harsa taka khawsa mek Mizoram mipuite dawmkanna tur Relief Programme liantham tak duangchhuak thuai turin MNF sawrkar an ngen tih an sawi.

Nimin a thuchhuah an siam ah Congress Legislature Party chuan COVID-19 in Mizoram min nuai na ta hle mai tih tarlangin, damdawi-a inenkawlna, Staff lak belh leh Laboratory tih chakna lama hmalakna a chak tawk bawk si loh avang leh, Mizoram sawrkarin kawng dang zawh tur a hriat loh miau avangin Total Lockdown puan a ni leh mai thin niin an sawi a. “India rama Total Lockdown puang rei ber kan ni a, thla tam tak hna thawk thei lo a kan awm tawh avangin chhungkaw tam tak sum lakluhna in a chhiat phah a. Thla engemaw zat sum lakluh nei mumal tawh lo te, In leh dawr luahman pe thei lo te, ei tur leina tur pawh nei tawh lo te, sumdawnna tlachhe ta, Bank loan rul thei lo te, mangang em em a khawsa sang tam tak an awm mek a ni,” an ti.

Congress Legislature Party chuan hetiang hi kan dinhmun a nih laiin MNF sawrkar chuan Total Lockdown vanga harsatna tawkte tanpuina lam a la hawi duh chuang lo nia sawiin, “Harsatna tawkte tanpuina tur, Relief Measure pakhatmah a ruahman lo a, mipuiin sawrkara Chhiah leh Bill kan pek turah ngaihnatthiamna engmah a siam duh hek lo,” an ti a. Mizoram sawrkar hian COVID-19 leng karah pawh sawrkar laipui atanga pawisa hmuh tura an beiseite an hmu tha tawk tih Finance Commissioner Vanlalchhuanga'n July 22, 2021 khan a lo sawi tawh nia sawiin, “Chuvangin, Total Lockdown avanga eizawnna kawnga talbuai te, dinhmun harsa taka khawsa mek Mizoram mipuite dawmkanna tur Relief Programme liantham tak duangchhuak thuai turin Congress Legislature Party chuan MNF sawrkar kan ngen a. Mipui thawhkhawm CM Relief Fund hmang chauha tanpui ngaite tanpui hi sawrkarin a tum tur a ni lo a, sawrkar buhzem ngei hi mipui tan a hawng tur a ni tih hi kan ngaihdan a ni,” tiin chutiang a ruahmanna siam kawngah chuan theihtawp chhuaha sawrkar pui turin an inring reng tih a sawi bawk.