Serchhip District-ah Hri leng avanga inkhuahkhirhna thlahdul hret a ni

Serchhip District chhunga COVID-19 hri leng avanga inkharkhipna kalpui chhunzawm zel dan tur chu nimin khan Serchhip District Disaster Management Authority (DDMA) huaihawtin sawihona neih a ni a, inkaihhruaina thenkhat chu thlahdul tura ruahman niin inkaihhruaina thar pawh siam nghal a ni bawk.

Serchhip District Disaster Management Authority huaihawta inkharkhipna kalpui mek chungchang sawihona hi Serchhip DC Meeting Hall-ah neih niin DDMA Member te bakah khawpui chhunga VLTF aiawhte, YMA aiawhte, sumdawng pawl aiawh thenkhatte leh Official sawm bikte pawh an tel a. He thutkhawm kaihruaitu District Bawrhsap, Kumar Abhishek chuan Serchhip District-a Medical Team te, VLTF te, leh COVID-19 laka kan him theihna atana thawktu zawng zawngte thawhrimna zarah Serchhip District chu hmun him leh dinhmun tha taka kan din phah mek tih sawiin, an chungah lawmthu a sawi a. Kan hmaa hnathawh tur la awmte pawh tha taka thawk zel tura sawmin, mipuite chu COVID-19 Vaccine kokim taka la tur leh COVID-19 laka himna dan, Covid Appropriate Behaviour te tha taka zawm theuh turin a ngen bawk.

He Meeting-ah hian District Level-a inkaihhruaina siam tura phalna a pek china Serchhip District-a inkhuahkhirhna kalpui dan tur sawiho niin khawpui chhunga Taxi te chu nitin an service phalsak an ni a, Auto Rickshaw te chu Registration Number tawpa Odd leh Even Number te ni inkar thlaka Service tir rem tih sak an ni a, Serchhip leh Aizawl inkara tlan Maxi Cab te pawh an awmna VLTF te hnenah phalna lain an duh ni apiangah tlan phal sak an nih bakah District chhung khua te leh Serchhip inkar Service Sumo te pawh Service tir remtih sak an ni bawk. Heng passenger phur lirthei te hian COVID-19 laka himna dan (Covid Appropriate Behaviour) te tha takin an zawm vek tur a ni thung.

Serchhip khawpui chhunga eichawp lam chi zuar dawr zawng zawngte leh Hardware dawr te chu nitin zing dar 5:00 atanga tlai dar 5:00 thleng inhawn phal an ni tawh dawn a, dawr dangte chu kar khatah ni 4 chhung hawn phal sak an ni a, an inhawn chhawk dan tur chu VLTF ten an duan sak ang. Serchhip Bazar Building pui pawh hawn tawh tur a ni dawn a, chawhmeh leh eichawp te, thlai chi lam zuarte chu nitin an inhawn phal an ni a, dawr dangte chu kar khatah ni 4 an inhawn phal sak thung an ni.

Tunhnaia Serchhip-a COVID-19 hri leng chungchang pawh he hunah hian sawiho niin Veng pakhat-a COVID-19 lo darh deuh chhan chu mi pakhat, State pawn atanga lo haw; sawrkar in inkhunghranna dan a siam bawhchhetu vanga lo irhchhuak nia hriat a nih avangin dan bawhchhetu hi hremna pek ni se an ti a ni.

Hei bakah hian Vaccine pek hna kalpui mek chungchang pawh sawiho niin VLTF ten anmahni huamchhung theuh ah vaccine la la lote lo indapchhuak tiin, chung miten vaccine an lak theih dan tur ruahmanna siam zui a ni ang. Kum 18 chung lam Adhaar Card leh Document dang nei lo, Vaccine la duhte tan pawh Vaccine hi Serchhip Main Centre-ah lak theih dan dap sak an ni dawn bawk a, Vawiin atangin Main Centre hi a duh apiang tan pan theih a ni dawn a ni.