Latest News

Serchhip-a MHIP Branch hrang hrang ten an remchan angin MHIP Day an hmang

Nimin July 6, 2021 kha Mizo Hmeichhe Insuihkhawm Pawl (MHIP) dinchampha, MHIP Day vawi 47-na niin hri leng avanga a huho-a hman a remchan loh avangin Serchhip-a MHIP Branch hrang hrangte chuan an remchan angin he ni pual hian hun an hmang a ni.

MHIP Sub-Hqrs. Serchhip President, Sanghmingliani chuan MHIP Day vawi 47-na pual hian an member te chibai bukin, nikum leh kumin lamah a huhova hman theih a ni lo chung pawha an din chhan ang taka Branch hrang hrang ten midang te tanpuina hun atan an hmang chu lawmawm a tih thu a sawi bawk. MHIP Sub-Hqrs. Serchhip hian MHIP Day pual hian Serchhip-a COVID-19 hri kai te enkawlna hmun, Covid Care Centre (CCC) tanpuina atan Rs. 5000/- an hlan bawk. MHIP Sub-Hqrs Serchhip hnuaiah hian Branch 77 awmin member 18,672 an awm mek a ni.

MHIP Day hi Serchhip khawpui chhunga MHIP Branch hrang hrangte chuan midang te tanpuina hun atan an hmang hlawm a, kan hriat theih chinah Serchhip Kawnpui Branch MHIP te chuan VLTF Kawnpui hnenah tanpuina atan Rs. 2000/- an hlan a, Serchhip Kawnpui South Branch te chuan Nursing School CCC-a awm mek te chhun thingpui hmeh atan Sawhchiar an siam sak bakah, an Branch Executive member damlo pakhat chu an kan bawk. Chhim Veng Branch MHIP te chuan an member damlo leh kum upa chak tawhlo mi 5 te tanpuina an hlan a. Serchhip Vengchung Branch te chuan an huamchhunga damlo mi 3 chu Rs. 1000/- theuha an kan bakah Serchhip Distict Hospital Poor Fund-ah Rs. 2000/- an chhunglut a. Serchhip Chanmari Branch ten an member mi 2 damlo an kan bakah chhungkaw harsa pakhat Rs. 1000/- an hlan bawk.

Bukpui Branc hMHIP te chuan zingkar-ah Swadhar Greh, Thlamuanna In-ah tanpuina Rs. 1000/- hlanin chawhnu lamah an member zirlai titha mi 3 te chawimawina leh lawmpuina hun an hmang a, IOC Veng Branch MHIP te chuan hnatlang neia hun hmangin New Serchhip Bazar Branch te chuan Old Age Home-a thilpek an hlan bakah an member mi harsa te tanpuina an hlan a. Serchhip P&E Veng Branch MHIP te chuan MHIP Day pual hian zirlai titha chawimawina hun an lo hman tawh bakah Nursing School CCC-ah tanpuina pein nimin khan hnatlang an nei bawk.

Comments

Chhiar Hlawhte