Mizoram-ah COVID-19 hri kai 27,153 tling tawh

Mizoram-a COVID-19 hri kai hmuhchhuah zat chu ala tlahniam thei tak tak lova, Inrinni khan Sample 4679 enfiah niin hri kai hmuh leh an ni a, Mizoram-a hri kai hmuhchhuah chu 27,153 an tling tawh a ni.

Inrinni khan ZMC-a RT-PCR Laboratory-ah Sample 1850 enfiah niin hri kai 73 hmuh an ni a, hri kai hmuhchhuah te hi Aizawl District atanga Sample lak vek niin an zinga mi 69 te hi hri kai tawh nen inkawmhnaihna neih avanga inkhunghrang lai an ni a, midangpakhat hi tunhnaia State pawn atanga rawn haw niin mi pahnih hi State pawn lama zin dawn avanga Sample enfiah atanga hri kai tih hmuhchhuah niin pakhat dang erawh hri mahni inrinhlelh avanga Sampel enfiah leh hri kaina hriatloh a ni bawk.

District hrang hranga TrueNat Laboratory-ah Sample 512 enfiah ni bawkin heng atang hian hri kai mi 45 hmuhchhuah an ni a, an zinga 36 te chu Lunglei District-a hri kai hmuhchhuah niin heng zinga 33 te chu ABCI Camp-a awm an ni. Aizawl, Champhai leh Lawngtlai District-ah hri kai mi pahnih theuh hmuh niin Kolasib, Mamit leh Serchhip District-ah hri kai pakhat theuh hmuh an ni bawk.

Mizoram District hrang hrangah Rapid Antigen Test hmangin Sample 2317 hmuhchhuah niin heng atang hian hri kai mi 345 hmuh an ni leh bawk a. RAgT hmanga hri kai hmuhchhuah zinga 219 te hi Aizawl District-a hri kai hmuhchhuah niin Baktawng Tlangnuam-ah hri kai mi 25 hmuhchhuah an ni a, (Baktawng Tlangnuam hi Serchhip District ni mah se Health Department ramri then ah Aizawl District enkawl a ni). Heng bakah hian Lunglei District-ah hri kai 43 hmuh niin Kolasib District-ah hri kai 35 hmuh an ni a, Mamit District-ah hri kai 28 hmuh ni bawkin Lawngtlai District-ah 13, Siaha District-ah 5 leh Champhai leh Khawzawl District-ah pakhat ve ve hmuh an ni bawk.

Mizoram-a hri kai hmuhchhuah an pun zel lai hian enkawl dam pawh pung ve zelin Inrinni khan mi 307 enkawl dam niin nimin khan mi 90 enkawl dam an ni ve leh bawk a. Heti hian nimin tlai dar 5:00 thlenga Mizoram-a hri kai hmuhchhuah chu 27,153 niin heng zinga 21,226 te chu enkawl dam an ni tawh a, hei hi hri kai hmuhchhuah atangin zaa 78.17 niin tunah hian hri kai enkawllai 5805 an la awm a ni.

COVID-19 hrikai zingah boral awm belh zel :

Mizoram-a COVID-19 hri kai zingah nunna chan awm belh ve zelin Inrinni zan dar 9:00 khan K. Lianthangi (75), Ramhlun North chu ZMC-ah a boral a, ani hi July 16-a hri kai hmuhchhuah kha niin ZMC-ah enkawl nghal ni mah se a tuk-ah a boral zui ta a ni. Nimin tlai dar 3:40 khan Lalchhungi (65), Sairang Dinthar Veng chu ZMC-ah a boral ve leh bawk. Heti hian Mizoram-a hri kai hmuhchhuah zingah mi 122 zet an boral tawh a, tun thla chhungin mi 27 boral an awm tawh a ni.