Latest News

COVID-19 hri kaite enkawlna hmun atanga chhuahtir dan tur chungchang sawihona nei

Nimin khan Health Minister Dr. R. Lalthangliana hovin SAD Conference Hall, Aizawl-ah Mizoram-a COVID-19 hri kaite enkawlna hmun atanga chhuah tir dan tur chungchang sawiho a ni.

He sawihona hunah hian July 13, 2021-a Mizoram Doctor thiam rual ten inrawnkhawmna, Joint Consultation Meeting an neiha COVID-19 hri kaite enkawlna hmuna chhuahtir hun leh chhuahtir dan tur chungchanga rawtna an siamte sawiho a ni a. Joint Consultation Meeting aiawha tel te chuan Mizoram-a COVID-19 hri kaite zingah symptom nei tawh lo leh symptom nei manglo te rei tak tak khung reng hian anmahni ah nasa takin rilru leh hriselna a nghawng tel thei tih an sawi a. COVID-19 chu hri chhuak thar a nih vangin a nihphung chiang taka zir chhoh zel a ni a, a tir lama kan hmuh dan leh hriat dante pawh khawvel ram hrang hrangah mithiamten an zirchiang zel a, a ziarang an hriatchian belh zel avangin hri kaite enkawl dan leh enkawlna hmuna chhuah tir dan te pawh an thlak danglam tih an sawi a. World Health Organisation (WHO), United States Centers for Disease Control and Prevention (U.S,CDC) leh Korea Centers for Disease Control and Prevention (Korea CDC) leh ram dang tam takin May thla khan Scientific evidence an neih tawh atangin COVID-19 hri kaite enkawlna hmun atanga chhuah tir dan kalphung an thlak a, hemi hnu lawk hian Indian Council of Medical Research (ICMR) pawhin an tidanglam ve bawk tih an sawi a. He kalphung thar hi khawvel ram hrang hrang bakah India ram State zingah Mizoram tih loh chuan an hman vek tawh thu an sawi a ni.

Rawtna tharah chuan India ram hmun dang ang leh khawvel ram hrang hranga an kalpui angin natna lang chhuak lo (asymptomatic) leh natna lang chhuak nasa lo (mild symptomatic) te chu natna hrik hmuhchhuah a nih atanga ni 10 chhung uluk taka vil an ni ang a, hemi hun chhunga a tawp lam ni 3 (ni 7 - 10 inkar) ah khawsik an neih loh chuan ni 10-na ah test tawh lovin chhuah tir (discharged) an ni ang a, mahni In lamah uluk taka inchik chungin nunphung pangngai an zawh thei ang. Heng bakah hian discharge chungchangah rawtna chi hrang hrang an siam a, sawrkarin a tul angin ruahmanna a siam zui dawn a ni.

Comments

Chhiar Hlawhte