Serchhip District Jail-a tang, Serchhip Damdawi In-a enkawllai tlanchhuak zawng mek

Serchhip Police ten rukruk kaihhnawih thubuai-a an man, damdawi In-a enkawllai chu nizan hmasa khan Serchhip District Hospital atanga tlanchhuakin he thu buatsaih lai thleng hian man leh tumin zawn mek a ni.

Thudawn danin tang tlanchhuak hi Johan MS. Zuala (34) s/o Rallianzuali, Serchhip Saron Veng niin Serchhip Police ten Ar Chaw bo thubuaia an zawn laiin New Serchhip-a eirawngbawlna Gas bur bo kaihhnawih ah man a ni a, hemi hnu hian Serchhip District Jail-ah dahluh niin hun engemaw chen Jail-a enkawl a nih hnuah July 16 khan Jail chhung inthiarna ah tlu sual nia insawiin Serchhip damdawi In-ah hruai a ni a, Doctor ten an enfiah hnuah a ban ruh a tliak tih hmuhchhuah a ni a, July 23-ah District Hospital-ah hian zai tura tih a ni a, hei vang hian July 19, 2021 khan Serchhip damdawi In-ah hian admit niin, July 26, 2021 zan dar 6:30 vel khan Serchhip damdawi In-a inthiarna hmun-a a inthiar tura a lut chu amah kalpuitu, Lalthangliani nen an tlanchhuak ta nia thudawn a ni.

Serchhip District Jail-a tang in Jail chhunga hliam a tawrh chungchangah hian LENKAWL chuan Serchhip District Jail Superintendent, Laldingliana Chinzah chu bepawpin District Jail Superintendent chuan hemi chungchang hi anmahni pawhin an lo chhui tawh thu leh Johan-a hian Jail pawn lama awm a nupui damlo enkawl a duh avanga chhuah dan dapin, a tan pui pakhat chu a ban ruh vaw tliak tur leh a thubuai a pawisa chawi ngai te chawi sak turin a lo thlem thin tih an hriatchhuah thu a sawi a.

Vawi engemaw zat a thlem hnuah a tan pui pakhat hian rem lo tiin thingfak in a banruh veilam chu a vuak tliah sak tih Jail Superintendent chuan sawiin, Johan-a erawh hi chuan Jail chhung Bathroom-a tlusual anga a insawi thung thu a sawi a. Hetiang bawk hian tunhma deuh khan a ban dinglam ruh chu a lo tih tliah tawh bakah a tan pui pakhat pawh hetiang deuh hian kawng a lo kawhhmuh tawh thu a sawi a. Tun tuma a ban ruh tliak hi ama duhthu ngeia ti a ni tih sawiin, hei vang hian a phu tawk hremna pe turin Serchhip CJM hnenah an thlen thu a sawi bawk a ni.

Serchhip Police Station-a Office Incharge chuan Johan MS. Zuala chin hria leh lo hmu chuan Serchhip Police Station, Phone No. 03838-222528-ah emaw, 9366952057-ah emaw hriattir turin mipuite chu a ngen a ni.