Latest News

Ni khat-ah hri kai sang chuang hmuh an ni

Niminpiah khan Mizoram-ah Sample 6392 enfiah niin heng atang hian COVID-19 hri kai 1118 hmuhchuah an ni a, Mizoram-ah ni khat a hri kai hmuhchhuah an tam ber ni niin ni khat-a hri kai sang chuang hmuh an nih vawikhatna a ni bawk.

Niminpiah khan ZMC Laboratory-ah Sample 2057 enfiah niin heng te hi Aizawl District atangin Sample 1950 leh Serchhip District atangin Sample 107 a ni a, heng atang hian COVID-19 hri kai 311 hmuhchhuah niin Aizawl District atangin mi 309 leh Serchhip District atangin mi 2 an ni a, Armed Veng South atangin hri kai mi 35 zet hmuh niin Ramthar North atangin 31, Thuampui atangin 20, Chanmari West atangin 18, Zuangtui atangin 17 leh Dinthar Veng atangin 13 te chu Veng mal-a hri kai hmuhchhuah tam zualna a ni a, a bak zawng hi Veng leh khua 50 ami niin BSF Sipai mi 6 an tel bawk a. Serchhip District atanga hri kai hmuhchhuah te hi Thenzawl khua an ni thung.

District hrang hranga TrueNat Laboratory-ah Sample 404 enfiah ni bawkin COVID-19 hri kai mi 52 hmuhchhuah an ni a, an zinga 19 te chu Champhai District ami niin Lunglei District-ah 18, Lawngtlai leh Mamit District-ah mi 7 ve ve leh Khawzawl District-ah mi pakhat te an ni.

Niminpiah khan Rapid Antigen Test hmangin Sample 3931 enfiah leh a ni bawk a, heng atang hian hri kai 755 zet hmuhchhuah an ni a, an zinga mi 500 te chu Aizawl District-a hri kai hmuhchhuah an ni. Hri kai hmuhchhuah zingah hian Dinthar Veng tam leh berin mi 53 zet hmuh an ni a, Tuikual South-ah 36, Tuikual North-ah 24 leh Bawngkawn-ah 23 hmuh an ni a, Veng mal-a hri kai mi 10 aia tam hmuhna Veng 14 awmin a bak zawng hi Veng leh khua 56 atanga hmuh an ni thung. Kolasib District-ah hri kai mi 84 hmuh an ni bawk a, Lawngtlai District-ah 64, Lunglei District-ah 49, Mamit District-ah 42, Champhai District-ah 6, Serchhip District-ah mi 5 leh Saitual District-ah hri kai mi 3 hmuh an ni bawk.

Heti hian nimin thleng khan Mizoram-a COVID-19 hri kai hmuh tawh chu 34,570 an tling ta a, nimin khan mi 165 te chu enkawl dam an ni ve leh bawk a. Nimin tlai dar 5:00 thleng khan Mizoram-a hri kai te zingah 24,076 te chu enkawl dam ni tawhin hei hi hri kai hmuhchhuah atanga chhutin za zela 69.64 a ni a, tunah hian hri kai enkawllai pawh 10,355 niin hri kai enkawllai an tam lai ber niin Mizoram-ah hri kai sing khat aia tam an awm tumkhatna a ni bawk.

Hetihlai hian Mizoram-a COVID-19 hri kai zingah nimin khan mi 3 boral lehin nimin thlengin mi 140 zet boral an awm tawh a, nimin zing dar 5:10 khan Lianchhungi (68), Thingdawl chu Kolasib DCHC-ah boralin zing dar 7:40 khan Lalmalsawmi (45), North Chawnpui pawh Kolasib DCHC-ah hian a boral ve leh a. Nimin tlai dar 5:50 khan F. Taithuama (78), Central Jail Veng chu ZMC-ah a boral ve leh bawk.

Comments

Chhiar Hlawhte