Chanchin thar thenkhat :

Lunglei District in dawng

COVID-19 hri leng avanga Lunglei District Bawrhsap, Kulothungan A hmalakna a India ram chhung hmun hrang hranga NGO Foundation/Company/Corporation-te CSR kaltlanga Lunglei District in tanpuina a dawn kal zelah Medical Oxygen For All (MOFA), New Delhi atangin Oxygen Concentrator pasarih (7) dawn leh niin heng te hi nimin khan Lunglei DC chuan Lunglei CMO, Dr. LC. Liana hnenah a hlan a, heng khawl te hi a thawn man nen Rs. 7,00,000/- hu niin nimin khan Nestle Company atangin Maggi packet 9200 leh Energy drink bottle 2500 an dawng leh bawk a ni. Lunglei District hian NGO Foundation/Company/Corporation-te atangin tum 6 lai an dawnna a ni a, an thil dawn tawh hi a vaiin Rs. 99,50,000/- hu zet a ni.

Karleh ah raipuar pek beisei

COVID-19 Vaccine pek hna kalpui mek ah Raipuar te vaccine pek chungchangah sawrkar laipui a fimkhur tih nimin-a Health Minister hova sawrkar mi pawimawh te thutkhawm neih ah tarlan a ni a. Sawrkar laipui duhdanin vaccine petute chu tunkar chhung hian training uluk taka pek an ni a, karleh atang chuan pekchhuah tan theih tum a nih thu tarlan a ni bawk. Raipuar te hi vaccine pek an nih hmain uluk taka Counselling neih pui tur a ni a, anmahni duhthlanna ngeiin pek chauh tur an ni.

Contact Tracing Application

COVID-19 hri leng mekah Medical Operational Team leh Information Communication Technology Department tangkawp chuan online hnu chhuina atana hman turin contact tracing application, mcovid19.Mizoram.gov.in portal an siam a. Hei hi COVID-19 hri inkaichhawn dan chhuina (contact tracing) atan hman zel tawh tur a nih thu June 29, 2021 khan Mizoram Sawrkar Health Department chuan a tichhuak bawk a ni. Online Application hman dan hi Contact Tracing Team ten LLTF/VLTF te an zirtir dawn tih sawrkar thuchhuah chuan a tarlang bawk.

Zangnadawmna pek phut

Congress Thalai, Mizoram Pradesh Youth Congress Committee (MPYCC) chuan kumin March 21-a Lungsen khuaa (Lunglei District) African Swine Fever (ASF) vanga Vawk a thih atanga tun thlenga Mizoram-a Vawk 9,000 chuang a thih hnuah pawh Mizoram Sawrkarin zangnadawmna a la pe lo chu pawi an ti takzet tih thuchhuah siamin an tarlang a. Vawk vulhtute tawrhna chu Sawrkar in a la ngaihthah reng nia sawiin, mipui harsatna ngaihthah reng lova zangnadawmna rang taka pe tura sawrkar an phut thu an tarlang bawk.

ZPM Thalai in sawrkar phut

ZPM Thalaite chuan nimin khan thuchhuah siamin National Health Mission (NHM) hnuaia thawktu mi 2175-te rim taka thih ngam lu pu-a an thawh lai a, thla hnih lai hlawh la lova an awm chu pawi an tih thu tarlangin, hlawh an lâk thuai theihna tura hma la turin Mizoram sawrkâr an ngen tih an sawi a. NHM hnuaia thawkte hi hri do kawngah a râl hmatâwng an nih laia an zîngah COVID kai an awma an inenkawlna sênso anmahni intumtîr an ni lehzêl chu thil fello tak nia an hriat thu an sawi bawk.