Latest News

Insawithaihna awm ah pawh vaccine la turin sawm

State Immunization Officer Dr. Lalzawmi chuan Mizoram pumah tluang taka Covid hri danna (vaccine) pekchhuah a nih zel thu a sawi a, mipuite chu dawt leh insawithaihna a awm a nih pawha vaccine lak chu a him a ni tih hriaa la theuh turin a sawm.

Dr. Lalzawmi chuan Mizoram-ah nimin-a pekchhuah te nena belhkhawm chuan mi nuai 7 chuangin vaccine an lak tawh thu a sawi a. Hemi kawngah hian vaccine petute chu an thawhrim thu leh khaw thenkhatah phei chuan tuilian leh leimin te paltlanga rim taka vaccine pe tura an thawhchhuah thin thu a sawi a. Vaccine pekchhuah hna thawktute rim taka an thawh lai leh sawrkarin vawikhat vaccine lak man pawh to tak, a thlawn veka mipuite tana anmahni Veng theuha a chhawpchhuah sak chu thil lawmawm tak a nih avangin mipuite chu ngaipawimawha vaccine la zel turin a ngen a. Vaccine mamawh khawp chu Mizoram-in a dawn thu leh tun dinhmunah chuan an hnianghnar rih thu a sawi bawk. 

Dr. Lalzawmi chuan nu naupai vaccine lak chungchangah insawi-thaih an lo awm leh thin thu leh a hlauhawm loh thu a sawi a. Hei bakah hian Pathian thu zawnga la a insawithaih ching te thlenga an awm thu a sawi a. Mi nuai 7 chuangin an lak tawh hnuah pawh thil duhawmlo thleng engmah a awm lo chuan a hlauhawm lo a ni tih a tihchian thu a sawi a ni. Vaccine la tawh zinga hri vei nawn te chu vaccine a thawklo tihna a ni lo tih pawh sawiin, a vei nawn an awm pawhin an taksa-a a thawh dan a nep tawh em em a, kum upa lamah pawh an nat dan a nasa lo niin a sawi bawk.

Comments

Chhiar Hlawhte