ASF vangin Vawk 39 zet a thih belh leh; Serchhip khaw pumah Vawk talh khap a ni ta

Serchhip District-ah nimin khan African Swine Fever (ASF) vangin Vawk 39 zet a thi leh a, Serchhip District Magistrate chuan Serchhip khaw pum leh khawdang pathum-ah Vawk talh khapna thupek nimin khan a tichhuak bawk.

Serchhip-a AH&Vety Department chhinchhiah danin nimin khan Serchhip District-a ASF hri lenna hmuna puan khaw 5 atangin Vawk thi 39 zet a awm leh a, heng te hi Thenzawl-ah 23, Chhingchhip Mualpui-ah 8, Chhiahtlang-ah 5, Serchhip P&E Veng-ah 2 leh East Lungdar-ah pakhat te an ni a, heti hian Serchhip District chhung khaw 14-a ASF vanga Vawk thi chu 1069 zet a ni tawh a ni. ASF vanga Vawk thi tamna ber chu Thenzawl khua niin Vawk 292 a thi tawh a, New Serchhip-ah 251 thi tawhin P&E Veng-ah 163, Chhiahtlang-ah 133 thi tawhin khawdang 10-ah te hian Vawk thi tam tham tak a awm tawh bawk a ni. Nimin khan ASF hri lenna hmunah hian Vawk 14 suat leh niin heng khaw 14-a Vawk suat zawng zawng hi 560 a ni tawh bawk a ni. 

Nimin khan ASF hri lenna hmuna puan ni lo khaw pahnih-ah Vawk thi 4 a awm leh bawk a, heng te hi Bungtlang-ah 3 leh Vengchung-ah pakhat niin finfiah ni lo mah se ASF hri vanga thi nia rin an ni bawk a, Serchhip District chhunga khaw 21-ah chhan hriatloh a Vawk thi 156 zet awm tawhin nimin khan hri lenna hmuna puan ni lo ah hian Vawk 9 suat leh a ni bawk.

Hetianga Serchhip District-a Vawk natna hri, ASF a len mek avang hian Serchhip District Magistrate, Kumar Abhishek chuan nimin khan thupek siamin Serchhip khawpum-ah Vawk talh khap a nih thu a tarlang a. Serchhip District Magistrate thupek chuan ASF avanga Serchhip District mipui ten buaina leh harsatna kan tawh loh nan khapna thupek te pawh chhuah a lo nih tawh thu leh theihtawp-a invenna leh hmalakna a kal chungin khua leh Veng thenkhat chu hri lenna hmun (affected area)-ah sawrkar in a puan tak avangin Section 144CrPC 1973 in thuneihna a pek angin Serchhip khawpum, Chhingchhip Mualpui, Hriangtlang leh Zote South-ah te Vawk dam leh damlo talh leh zawrh khap tlat a nih thu a tarlang a. Heng khua ah te hian Vawk, Vawksa leh Vawksa atanga thil siam reng reng zawrh, lakluh leh lakchhuah khap tlat a ni tih tarlangin, Vawk thi a awmin AH&Vety Department mithiam te rawn chunga tihral tur a nih thu a tarlang bawk. Serchhip District Magistrate thupek hi chhuah a nih atanga thla hnih (2) chhung huam tur niin thupek zawmlo te chu Section 188 IPC Dan hmangin hrem theih an ni ang.