Latest News

ZPM Thalai in Hrangturzo Bial-ah hnathawh an tlawh

ZPM Thalai Serchhip Block chuan Serchhip District chhunga Mualcheng (Artahkawn) leh North Vanlaiphai inkar kawngpui siam mek chu a hna a chhiain a lungawithlak loh an tih thu an sawi.

ZPM Thalai Serchhip Block hian niminpiah khan Hrangturzo Bial chhunga kawngpui laih zauh leh siamthat hna thawh mek te chu sawisep a awm avangin a hmunah kalin an enfiah tih an sawi a, he hunah hian Hrangturzo Bial chhunga inkal pawhna kawngpui laih zauh leh black-topping hna lian tak, Mualcheng Artahkawn - N. Vanlaiphai leh Chekawn - N. Vanlaiphai kawng laih zauh mekte chu an hna thawh tawh chinte, Plan & Estimation te nen a inmil em tih te thlithlaiin, a hmuna thawktute pawh thil nihphungte an zawtfiah bawk tih an sawi.

ZPM Thalaite chuan Mualcheng Artahkawn - N. Vanlaiphai inkar kawng laih zauh leh black-topping hna thawh mek chu a hna a chhiain a lungawithlak loh an tih thu sawiin, he kawng laih mek hi Ministry of Rural Development hnuaia PMGSY hna niin, Bhavya Construction Company thawh a ni a, a kawng laih zauh (widening) chu zawh tep ni tawh mah se, black-topping a chhiat thu te, Fur khat pawh a tawrh hmain hmun tam taka a chhiat leh tawh thu te, hmun thenkhatah phei chuan kut lawng pawha kheuh khawh mai theih a nih thu te an sawi a. Hna thawktute chuan ruahtui tlak loh hnua black-topping chhe laite chu an siamthat leh dawn thu an lo sawi nia sawiin, sawrkar chu he hna thawh mek hi enfiah a, a tul anga hma la tura an phut thu an sawi bawk.

ZPM Thalaite hian PMGSY sum cheng nuai 1386 hmanga Chekawn to N. Vanlaiphai KM 21-a thui laihzauh hna thawh mek pawh tlawhin he hna hi LZ Constructions, Aizawl chuan an thawk a. He hna thawktute chuan April 2019 atangin hna tan tawh tur ni mah se North Vanlaiphai in YMA General Conference a thlen avanga thla 8 hnuah hna an tan chauh thu sawiin, Culvert engemaw zat dah belh leh tura tih an nih avangin hna zawh hun tura ruahman, kumin August thlaah chuan an zawhl theih an inrinloh thu an lo sawi bawk a ni. 

Keitum leh Khawlailung inkar Tuichang lui-a cheng vbc. 7.1 senga Thir Lei dawh mek pawh ZPM Thalaite hian tlawh nghalin Satguru Engineers & Allied Pvt.Ltd. Guwahati chuan he hna hi an thawk a. Tunah hian Lei structure hi dawh kai ni tawhin hri leng avanga thawktu inchahluh chungchangah hun engemaw chen harsatna an tawh thu an sawi a. Tunah hian ruahtui a tlak leh tak avanga duh anga hna an thawh chak theihloh thu pawh sawiin, ruahtui tla a ziaawm hnuah chuan thla li (4) chhunga an hna chu zawhfel theih an inbeisei thu hnathawktute chuan an sawi bawk a ni.

Comments

Chhiar Hlawhte