Latest News

Chanchin thar thenkhat :

PAB pawm thlirhona nei

Zirtawpni kalta khan School Education Minister, Lalchhandama Ralte hovin School Education Department hnuaia Officer-ten Online Meeting neiin Samagra Shiksha Project Approval Board (PAB)-in Mizoram tana hnathawh tur a pawmsakte an thlirho a. PAB in a pawm thar langsar zual zingah Secondary School thar 4 hawn belh turte, Higher Secondary School thar Arts Stream atan 4, Science leh Commerce inkawp atan School 2 hawn thar tur te a tel a. Kumdang a la hmuh ngai loh School Compound-a Tribal Affairs hnuaia Girls Hostel building sak tawhte School 11-ah Hostel enkawlna tur chu pawm a ni a. Vocational Education hawn belh nan School 6 chu pawm thar a ni bawk.

Heng bakah hian Virtual Lab Online Class Elementary leh Secondary tana neihpuina tur te, ICT@school hnuaia Smart Classroom kalpuina turte pawm a ni a. Hnathawh kal lai mek chhun-zawmna tur kumtina dawn thin te pawh pawm a ni a, Hindi Teacher 314 lak belhna turte pawm a ni bawk. Mizoram Samagra hnathawhna atana Ministry-in a pawm hi cheng vbc. 293 a ni.


Mass Testing neih thlirho

Nimin khan Health Minister, Dr. R. Lalthang-liana hovin SAD Conference Hall-ah AMC area a Sample Rest runpui (Mass Testing) neih mek chak zawka kalpui dan tur sawihona neih a ni a. He hunah hian Health Minister chuan kar kalta chhunga Mass Testing tluang taka kalpui a ni chu lawmawm a tih thu sawiin, Sample Test kan tih tam avang hian positive hmuhchhuah a tam lo thei lova, Positivity Rate pawh a sang ngei tur a ni a, hemi avang hian thlaphan leh chi-ai tur a ni lova, kan duhdan leh beisei ang tak a ni a, hri kaite kan hmuhchhuah zung zung hian kan tan a tha zawk a ni, a ti. IDSP hian tunah hian Sample Collecting/Testing Team 5 an nei a, Team 1-ah hian Sample la tu (Lab Technician) 4 leh Data Entry Operator 6 zel an awm a, indaihloha phuhru tura Volunteer lak belh dan tur pawh sawiho a ni bawk.


COVID enkawlna tur bik Hospital siam belh tul ti

Congress Thalai, MPYCC chuan ZMC bak hmundang Covid-19 enkawlna tur bik neih a pawimawh tih sawiin, hemi kawnga hma la turin sawrkar an phut. Inrinni-a thuchhuah an siamah MPYCC chuan tun dinhmunah Zoram Medical College, (ZMC) Falkawn chiah hi Mizo-ram pum tana Covid-19 hri natna vei enkawlna atan liau liaua damdawi In, 'Dedicated/Designated Covid-19 Hospital' hman lai kan nei tih an sawi a, Covid-19 hri vei damdawi In bika enkawl kan pun zel avangin Covid-19 vei bik chauh enkawlna hi a rang lama kan neih belh a ngai, hei aia ngaihpawimawh hmasak tur a awm lo a ni, an ti.

ZMC lamah khum leh ICU indaihlohna avang leh Dedicated Covid-19 Hospital hman lai pakhat chauh kan neih avangin vanduaina avanga Covid-19 hripui kaite tan a thlamuan thlak loh zual a, District tinah leh Aizawl-ah Dedicated Covid-19 Hospital a rang lama din belh kan phut a ni, an ti bawk.


Special Session koh duh

Zoram Peoples Movement (ZPM) chuan COVID-19 do kawngah sawrkar chuan Budget Session-a sum hman dan a ruahman pawh zawm hlei thei lovin a rem rem a pawt tih sawiin, hei vang hian Budget hi ennawn a, Budget-ah ngaih pawimawh hmasak turte siam tha leh turin, Special Assembly Session koh hi a tul tak zet tawhah an ngai tih thuchhuah siamin an tarlang a. CO-VID-19 hripuiin kum khat leh a chanve zet min luhchilh hnuah hripui a darh zual zel a, kai tam ber ni kan la thleng indawt reng mai chu politics-a hlawk tum ran chunga sawrkarin hri min dopui vangah an ngai tih an sawi a. Vawiin thlenga khauh taka inkharkhip a la ngaih chhan chu hri leng do dan dik tawk loh vang a ni tih hi pawm ngam turin sawrkar an phut tih an sawi bawk.

Comments

Chhiar Hlawhte