Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Chanchin thar thenkhat :

Sawrkar in inren turin ngen

Food, Civil Supplies and Consumer Affairs Department chuan nimin khan thuchhuah siamin mipuite inrenchem taka khawsa rih turin a ngen a. FCS&CA thuchhuah chuan Assam nena tunhnaia ramri buaina thleng avangin nitin mamawh chawk-luhna kawngpui a ralmuang rihlo tih tarlangin, Mizoram Sawrkar chuan mipui nitin mamawh POL leh LPG chu thenawm State dang atanga chawkluh tumin chak taka hmalak mek a ni tih an tarlang a. Amaherawhchu, hnianghnar taka State-in a chawkluh thin zat ang tun dinhmunah a pha rihlo tih pawh tarlangin, Buhfai chawk-luhna ber Rel kawng pawh Assam ramchhungah tihchhiat a ni bawk avangin hun rei vaklo chu buhfai thlen hun pawh a fan deuh rih dawn nia rin a ni tih an tarlang a. Hei vang hian chhungtin te theihtawpa inrenchem theuh tur leh mamawh bak, a chuang liam chheprelh lo turin an ngen bawk.


Cocoon lei sak mek zel

Lunglei District chhunga Pangang khawitute chuan kumin chhunga a vawi thumna atan nimin atang khan Cocoon an tharchhuah te chu Sericulture Department-ah an hralh leh tan a. Lunglei District chhungah hian Pangang khawi chhung-kua 480 awm mekin chhungkaw 70 te chuan Muga (Nauthak) Pangang an vulh a, chhungkaw 380 te hian Mulberry Pangang vulhin chhungkaw 30 in Eri Pangang an vulh bawk a ni. Sericulture Department-in a lei sak te hi Thuampui leh Vanhne kuthnathawktute tharchhuah Mulberry Pangang niin kg. khat hi Rs. 300 in kg. 130 an lei sak a ni.


Mizoram Governor in chhim

National Education Policy 2020 in kum khat (1) a tlinna lawmna pualin nimin khan Prime Minister Narendra Modi Video Conference neih a ni a, he hun hi Mizoram aiawhin Governor, Dr. Haribabu Kambhampati chuan a chhim a ni. Nimin-a he hun hman hi Union Minister for Education Dharmendra Pradhan chuan kaihruaiin Prime Minister Narendra Modi chuan NEP 2020 chungchangah thuchah a sawi bawk a ni.


MNF Thalai ten tlawh

MNF Thalai, Mizo National Youth Front (MNYF) chuan nimin khan an President, Er. Lalrinawma hovin Vairengte leh Saihapui 'V' an tlawh a, Vairengte Police Station-ah Police duty-te ei tur Dal bag 20 leh Tel case 10 an hlan a, Vai-rengte Jt. VC te leh Saihapui 'V' VC-te hnenah tangkafai an hlan bawk. Heng hmun an tlawhna ah hian MNYF President, Er. Lalrinawma chuan Assam sawrkarin min beihna kan sipaiten huaisen taka an lo beihlet dan chuan lungawithlak an tih thu leh an chhuan thu sawiin, “Mizote hian kan hun kal tawhah remna hlutzia leh man tamzia kan hre tawh a, hnamdang leh ram dang tihbuai emaw kan duh lo. Chutih rual chuan, kan awm mai mai laia kan chala chil min hnawmtute chu Mizo mipuite hian kan palzam thei lo a ni,” a ti bawk.


ZPM Thalai in rawtna siam

ZPM Thalaite chuan tunhnaia Mizoram chhûnga Assam sawrkârin harsatna a rawn siam avânga huaisen taka lo beilettu Vairengte khaw-tlâng mipui leh Mizoram Police-te, Kolasib District thuneitute chu an chhuangin an hnathawh a ropui an tih thu an sawi a. Hetih rual hian, kan thenawm Assam chu ramri-a development siam kawngah a hma aia nasa zawkin ke a pen nasa hle tih sawiin, Vairengte-ah Temporary Tactical Headquarters din ve tur te, FCS&CA, PHE leh P&E te'n ramri a duty kan Police-te tân tha thawh tur te, Mizoram Police-te hian lirthei an neih that loh avângin Transport Department-in Police phurh kual nan an Bus thawh tur te, Police te'n puan In an mamawh khawp an neih loh avângin Sport Department-in an Tent thate Police hman tura thawh tur te, Medical Doctor leh Nurse a hrana dah ve tur leh Police-te'n buhfai leh ei tur dang anmahni an in ngaihtuah chawp ngai loa Supply Department-in ngaihtuah sakin Police chu an duty pangngai ah chauh inthlûr bing turte in rawtna an siam bawk.

Comments

Chhiar Hlawhte