Khaw 7-ah Vawk talh khap leh

Serchhip District-a khaw 7-ah te chuan nimin khan Vawk talh leh zawrh khap leh a ni.

Serchhip District chhunga VC Area 19 te chu Vawk talh leh zawrh khapna hmuna puan a nih hnuah nimin khan khawdang 7 te chu Serchhip District Magistrate, Kumar Abhishek IAS chuan Sub-section (1) of Section 6 of the Prevention and Control of Infectious and Contagious Diseases in Animal Act 2009-in thuneihna a pêk angin Control Area-ah puangin Vawk dam leh damlo pawh talh leh zawrh a khap bakah Vawk, Vawksa leh Vawksa atanga thil siam reng reng zawrh, lâkluh leh lak chhuah khap tlat a ni tih a tarlang a. Heng khua te hi Chhingchhip, Khum-tûng, Chhuanthar Tlângnuam, Buhkângkâwn, Hualtu, Büngtlâng leh Buangpui khua te a ni.

Hetihlai hian nimin khan Serchhip District-a ASF hri lenna khaw 8-ah Vawk thi 54 zet chhinchhiah belh leh a ni a, Vawk thi tamna ber Thenzawl-ah Vawk 24 lai thi lehin Then-zawl-ah hian ASF vangin Vawk 577 zet a thi tawh a, Serchhip District-a ASF lenna hmunah Vawk 1688 a thi tawh a ni. Nimin khan ASF lenna hmun ni lo ah vawk thi 4 a awm leh bawk.