Latest News

Inkaihhruaina hman zui tur

Serchhip District Bawrhsap Kumar Abhishek chuan nimin khan thupek tichhuakin COVID-19 hri leng hluar zel laka mipuite him theihna tura tun thla ni 2-a inkaihhruaina thupek lo tihchhuah tawh chu Oct. 17, 2021 atanga Oct. 30, 2021 zanlai dar 12:00 thleng Serchhip District-ah hman chhunzawm tur a nih thu a tarlang.

Serchhip District-a ‘Project Thlai leh Thei’ kalpui dan tur sawihona neih a ni

Serchhip DC Office bultuma ‘Project Thlai leh Thei’ kalpui dan tur chungchang sawihona chu nimin khan Serchhip District Bawrsap, Kumar Abhishek IAS hovin neih a ni a, he Project hnuaiah hian Serchhip District chhunga thlai chin zirchiangin tih hmasawnna tur leh hlawk zawka hralhna tur ngaihtuah thlengin hmalak tum a ni.

Serchhip District chhunga loneitute thlai chin hrang hrang zirchian a, chhinchhiah fela, tih hmasawnna tura ruahmanna (Research, Documentation and Promotion of Horticulture in Serchhip District), ‘Project Thlai leh Thei’ tia vuah hi Serchhip Bawrhsap, Kumar Abhishek IAS hmalakna in Social Welfare & Tribal Affairs Department kaltlangin Ministry of Tribal Affairs, Govt. of India ah thehluh a ni a, sawrkar laipui hian he Project hi pawmin, Serchhip Deputy Commissioner leh Tribal Research Institute, Mizoram te chu Nodal & Executing Department an ni a, Horticulture Department Mizoram, Mizoram University (MZU), Horticulture College & Research Institute, Thenzawl leh Expert Agency dangte nena thawhho tura duan niin Project Monitoring Unit leh Project Implementing Unit te neiin hmalak dan tur mumal taka duan fel sa a ni.

He ruahmanna hnuaia hmalak dan tur sawihona hmasa ber hi nimin khan Serchhip DC Meeting Hall-ah neih niin Project bultumtu Serchhip DC Office-a Officer te leh Horticulture Department aiawhte, Horticulture College & Research Institute, Thenzawl aiawhte, KVK, N. Vanlaiphai aiawhte leh Rural Development Department aiawhte an tel a, he hunah hian hmalakna hmasa ber, Zirchianna (baseline survey) neih dan tur duan niin, Serchhip District chu bial li (4)-ah thenin heng bial-ah te hian mithiam tirh an ni dawn a. Survey neih dan tur ruhrel buatsaih dan turte, mithiam (Research Scholar) hmuh dan turte leh thil pawimawh hmasa hrang hrangte rel ho a ni a, Survey Team hi pahnih siam a ni anga, Processing lam zirchiang tur Team pakhat leh a hralhna lam dap tur Team pakhat siam a ni dawn bawk a ni. 

He project hian Serchhip District chhunga thlai leh thei lam chi tharchhuah chi hrang hrangte zirchiana, chhinchhiah that sak te, tam zawk leh hlawk zawka tharchhuah a nih theih nana loneitute tanpui leh an tharchhuahte mumal taka thliar fel (process & branding)-a hlawk zawka hralhchhuak sak dan zawn te chu a thil tum a ni a. Thla 20 chhunga he Project hi zo tura duan a ni.

Comments

Chhiar Hlawhte