Chanchin thar thenkhat :

Mizoram Police te Duty-na Assam Police ten an tichhia

Tunhnaia Assam leh Mizoram ramri-a buaina thleng chu la reh lovin ramri-a Mizoram Police Silai keng te awmna Puan In chu nimin khan Assam Police te hian tichhia in an Puan In te hi an lak sak nia thudawn a ni. Thudawn danin ramri a buaina thlenga Assam Police mi 200 rual ten Mizoram rawn lut-a Vairengte Aitlang-a an in kulh hnuah Mizoram Police te awmna tur, Duty Post thar chu nizan hmasa khan Vairengte thalaite leh 1st Bn. MAP te chuan siam ve nghalin nimin zing dar 3:00 vel khan luah a. He Duty Post hi Assam Police te inkulhna ep, mual hrana awm a ni.

Mizoram Police Duty Post siam thar hi darkar 12 vel chauh an luah hnu, nimin chawhnu dar 2:30 vel khan Assam Police te hi rawn che lehin Mizoram Police te nen hian an innawr a, 1st Bn. MAP te Puan In chu Assam Police te hian an lak sak a, an duhna chin ah an nawrlet bawk nia thudawn a ni bawk. Tunah hian Mizoram Police thahnem tak chu Vairengte-ah hian awmin Assam Police inkulhna lama Duty erawh an tam lo niin thudawnna chuan a sawi bawk.

Health Ministry in buatsaih

Sawrkar laipuia Ministry of Health chuan COVID-19 chungchanga thuthar thehdarhtute zirtirna, ‘Online Media Interaction on Community Ownership of Covid Appropriate Behaviour Evidence Based Reporting and Busting Myths on Covid & Vaccination’ tih chu nimin khan a buatsaih a, he hunah hian ramchhunga state, sawrkar Department leh vantlang tanrual a ngaih thu Health Ministry hotute chuan sawiin, COVID-19 hri chu thingtlang kilkhawr thlenga a darh thu leh hemi atan hian thingtlang-a inenkawlna hmun tha leh uluk tak duan a ngaih thu tarlan a ni. Health Ministry hotute chuan dan rangkachak pathum ti-a sawi, hmaikawr vuah, kut silfai leh mipui inhlata awm chu a pawimawh hle tih sawiin, tha taka hei hi mipuiten an zawm theih nana tan la turin thuthar lakhawmtute an sawm bawk.

Harsatna sukiang turin ngen

National Health Mission (NHM) hnuaia hnathawktu intelkhawm, NHM Employees Union Mizoram chuan an hnathawhna a harsatna an tawh te sutkian sak turin sawrkar an ngen a. An harsatna an thlen zingah hian thla hnih hlawh an lak tawhlo thu te, an member hri leng dona a thawk zingah hri kai te an inenkawlna senso anmahni intum tir chungchang te a tel a ni.

CM in zahna chibai a buk

Nimin July 1, 2021 khan rampumah Doctor te ni, Doctor Day hman a ni a, he ni pual hian Chief Minister Zoramthanga chuan Mizoram-a Doctor te chibai bukin, hri leng dona kawnga hma-tawng-a thawk mek Doctor te chu zahna chibai a buk a. Doctor te bakah hriselna lama thawk, mahni nunna thap-a midangte tana inpe zawng zawng te hnenah Mizoram mipui aiawhin lawmthu a sawi bawk.

IDC Fortnight kalpui dan tur hrilhfiah

Lunglei District Chief Medical Officer, Dr. LC. Liana chuan nimin khan thuthar thehdarhtute kawmin July 1 atanga ni 15 chhunga Intensified Diarrhoea Control Fortnight kalpui an tum dan a hrilhfiah a. Intensified Diarrhoea Control Fortnight chhung hian Health Worker leh ASHA te kaltlangin District chhunga naupang kum 5 chin hnuailam tan In tinah ORS leh Zinc sem anih dawn bakah kawthalo te tan Sub-Centre ah ORS leh Zinc lak theih a ni dawn a, Zinc hi ni 14 chhung an eitur a ni. Kawthalo chu COVID19 symptom pakhat a nih theih avangin Containment Area-a kawthalo te chu Covid test neih ngei ngei tur a ni dawn bawk a ni.