Chanchin thar thenkhat :

Lok Sabha MP in sawipui

Lok Sabha MP C. Lalrosanga chuan nimin khan Parliament Central Hall-ah Minister of State for External Affairs thar, RK. Ranjan Singh kawmin Myanmar atanga Mizorama raltlante tanpui dan chungchang a sawipui a, Myanmar ramri hrula awmte Covid-19 laka invenna damdawi lam hmanrua te leh a veite tana Oxygen mamawh pek dan turte ngaihtuah turin a ngen a ni. He hunah hian Ranjan Singh chuan External Affairs Ministry kaltlanga tih theih ang angte tih a nih tur thu Lok Sabha MP, C. Lalrosanga chu a hrilh a. Mizoram-a Passport Seva Kendra tih phui-suina tur leh a tul chuan din belhna tur rawtna te thlen turin C. Lalrosanga chu a hrilh bawk. Hei bakah hian Minister of State for Education ni bawk Ranjan Singh chuan zirna lam kaih-hnawih tul ang ang a hnena thlen turin MP chu a sawm bawk a ni.

Kawng laih hna bul tan

National Highway No. 6 (Seling-Cham-phai) Double Lane-a laih zauh hna thawh chhoh mekah Khawzawl leh Champhai inkar kawng KM 26.78-a thui laih bultan tur chu nimin khan Khawzawl Lungvar Veng-ah Khawzawl District Bawrhsap, Zothanmawia chuan a hawng a. Tuna State Highway hman mek, Khawzawl leh Champhai inkar kawng hi KM 40 a thui niin Kawngpui laih thar tur hi KM 26.78-a thui tur a nih avangin a hma aiin KM 13 zetin a tawi zawk dawn a ni. He kawng laih hna hi Rs. 37,04,32,00,000/- senga thawh tur niin NHIDCL hnuaia Contractor, M/s Shri Balaji Construction Company ten an thawk dawn a, kum 2 chhunga lai zo tur leh kum 5 dang enkawl zui tura ruahman a ni.

MHIP hruaitu insiamthar

MHIP General Hqrs. President, Lalthlamuani chuan a nihna atanga banna a thehluh avangin MHIP General Hqrs. President atan T. Lalthang-puii; Vice President-ah Lalthlamuani leh General Secretary-ah Saipuii te ruat thar an ni.

Mass Testing-ah hri kai 479

Mizoram sawrkar in Aizawl khawpui chhung Veng thenkhat-a COVID-19 Mass Testing an buatsaih ah Health Department hnuaia IDSP-in an chhinchhiah danin nih hnih chhungin Veng 10 ah mi 14,433 te Sample enfiah ni tawhin hri kai mi 479 hmuh an ni tawh a, Sample enfiah atanga za zela 3.32 te chuan hri an kai a ni. Mass Testing atanga hri kai hmuhchhuah te hi tihfel ngai a awm zui thin avangin Official Data-ah erawh dah nghal a ni lo thung.

CMRF-ah nuai 2 chhunglut

Synod Office Staff Welfare chuan CO-VID-19 hrileng mek laka mipui an him theih nan leh a tul apianga hman turin nimin khan Chief Minister's Relief Fund for COVID-19 ah Rs. 2,00,000/- an chhunglut a. Heti hian nimin thleng khan CMRF atana mi tlawmngai leh pawl te sum thawhkhawm chu Rs. 29,21,22,678 niin nimin thlengin sum hman tawh chu Rs. 25,31,14,470/- a ni a. Tunah hian Rs. 3,90,08,208/- ala awm mek a ni.

A ruka Zirtirtu la ah puh

Mizoram sawrkarin kumin tira High School 100-a thawk tur zirtirtu a ruka lak te chu chawlh tir vek turin National Students' Union of India (NSUI), Mizoram chuan an phut tih an sawi. NSUI (Mz) hian thuchhuah siamin, kumin tir lam khan Government High School 95, RMSA High School pali leh Lumpsum Grand-in-aid High School pakhat, a vaiin High School 100-a thawk tur zirtirtu 154 lai mai Mizoram sawrkar chuan a rukin a la nia sawiin, he'ng zirtirtu lak thar te hi an hna atanga chawlhtir vek turin an phut tih an sawi a, heng mite hi ban-a a bul atanga lak leh a nih loh chuan hmalak zui zel an tum thu an sawi bawk.

NSUI (Mz) chuan Zirtirtu lakna tur hian Advertisement chhuah a nih loh thu leh tu lak nge an nih tih pawh hriat a nih loh bakah, Appointment/Engagement Letter pawh pek an nih loh thu sawiin, zirtirtu a lak zingah hian High School zirtirtu atana qualified lo an awm thu an sawi a. Tute'n emaw an thawhna tur High School-ah Joining Report pe tura an tih angin Joining Report an pe tawp nia sawiin NSUI chuan, “Chumi zarah chuan DEO te pawhin an District chhungah zirtirtu thar an awm tih an hre ve chauh a ni,” an ti.

MRB Branch thar hawng

Mizoram Rural Bank Chairman V. Jaya Chandra chuan nimin khan Mizoram Rural Bank (MRB)Branch 90-na turin Mimbung Branch a hawng a, an Branch hawn thar chu Mimbung leh a chhehvel khuate tan hmasawnna thlentu a nih ngei a beisei thu a sawi bawk. September 27, 1983-a Regional Rural Bank Act (1976) hmanga din Mizoram Rural Bank hian nimin-a Mimbung Branch hawn thar tiamin tunah hian Branch 90 neiin, RD Block zawng zawngah Branch a nei vek a. Kum 2011 atang khan CBS hmanga Branch zawng zawngte thlunzawm vek a lo ni tawh a ni.