Health Minister hovin District Bawrhsap ten COVID-19 hri leng dona kawnga hmalak dan an thlirho

Health Minister Dr. R. Lalthangliana chuan Mizoram District tin ten COVID-19 dona kawnga hma an lak dan chu lawmawm a tih thu sawiin, Sample enfiahna hmanrua, Sample Test Kit (RAgT) chungchangah harsatna a awm loh thu a sawi bawk.

Mizoram District hrang hranga Deputy Commissioner te chuan nimin khan Health Minister, Dr. R. Lalthangliana hovin biak hmuhtheihna hmangin COVID-19 hri leng chungchanga hmalak dan an sawiho a. He hunah hian Mizoram District 11 zingah Aizawl leh Lawngtlai tihloh District dang zawng atangin DC leh CMO te an tel a. He hunah hian Health Minister chuan District tin ten COVID-19 dona kawnga hma an lak dan chu lawmawm a tih thu sawiin, Vaccine pekchhuah kawngah theihtawp chhuah chhunzawm zel turin a chah a. India rama vaccine pe kim hmasa ber State ni turin anmahni bial theuhah tan la turin a chah a ni. Health Minister chuan Sample Test kawngah hri inkaichhawnna dan chah a nih theih nan a tul dan azira Sample Test bei ngawrh turin a chah a, Sample Test Kit (RAgT) chungchangah harsatna a awm loh thu sawiin, an mamawh ang zat te la thuai thuai zel turin a chah bawk. COVID-19 Third Wave lo thleng thei nia sawi laka inbuatsaih tura in hriattirna an chhuah tawh anga District tinah naupangte enkawlna tur ruahmanna siam turin a chah bawk a, PM-Cares hnuaiah District tinah Oxygen Plant dah tum a nih thu sawiin, Mizoram sawrkarin cheng vaibelchhe 6 vel a sen ve a ngaih tur thu a sawi bawk.

He hunah hian Lunglei District tih loh District dangahte chuan Total Lockdown kalpui a nih loh thu DC ten an sawi a, an District dinhmun an thlirin mipuiten sawrkarin inkaihhruaina dan a siamte an zawm tha a, harsatna liantham an la tawh loh avang leh hri inkaichhawnna an la thunun thei nia an hriat avangin COVID Appropriate Behaviour zawm chungin fimkhur takin dawrte pawh hunbi tuka an hawn thu an sawi a, VLTF leh Executive duty ten uluk taka hma an lak reng thu sawiin, District 6-ah chuan Containment Zone puan mek a awmlo a ni.

District hrang hrangte hian Sample Test bakah CCC leh 4C chungchangah harsatna an tawklo tih sawiin, Vaccine pek hna pawh tluang taka kalpui a nih thu an sawi bawk a ni.