Latest News

Electric Bill chungchangah Consumers Union leh P&E Department hotu ten inbiakna an nei

P&E Department-in June thla Electric Bill an siam ah Metre Reading la lova Bill an siam avanga Mizoram Consumers Union (MCU) ten hma an lakna kal zelah nimin khan P&E Department aiawhte nen inbiakna neiin Bill la pe lo tan pawh pek theih a nih tawh thu leh la pe duhlo tan pawh Meter Reading neih hunah pek theih a ni dawn tih an sawi.

Serchhip District Consumer Association (SDCA) hruaitute hnen atanga thu kan dawn danin P&E Department in tun thla-a Electric Bill an siam dan phung duh lova thuneitute siam tha tura an ngenna leh, hetiang ang Bill diklo tam tak awm hi mipui tan pek a him lo ti-a thuchhuah an lo neih tawh kal zelah nimin khan MCU, Aizawl hruaitute leh P&E Department hotute chuan inbiakna an nei a. P&E Department lam pawhin an thil tihdan dik tawklo chu an pha lo tih sawiin, P&E Department hian tuna reading an lak mek hi thla hnih (2) Bill atan a Reading hi then sawmin Bill siam leh vek a ni dawn tih an sawi a, tuna Reading tellova Bill siam hi ngaih tha lova pe duhlo an awm chuan Bill an pe lo ang a, nakinah Meter Reading kaltlanga Department lamin Bill an rawn siam hunah tuna an pek loh hi an Unit hman dan milin thla hlui Bill pek loh vanga pung (surcharge) awm lovin an pe ang tih an sawi a. Tun thla Bill pe lo tan an Bill pek loh avangin an Electric Connection hlihsak an ni lovang tih an sawi bawk.

Electric Bill hi an Bill a dik ni a hria a pe duh tan Online hmangin a pek theih reng tih pawh sawiin, Bill sang lutuk leh ngaih tha lo chuan Bill pe mai lovin Department-ah complaint theih a nih thu leh a duh tan Meter Reading mil-a Bill siam a nih hnuah pawh enfiahin Bill hi pek theih a ni tih an sawi a, Complaint hmain bill sang a chu pek loh tur a ni tih an sawi a. Online emaw Offline hmanga Reading la lova Department in Bill an siam lo pe tawh te chu thla lehah Reading kaltlanga bill siam anih hunah tuna an pek tawh zat hi tihhniam(deduct) an nih tur thu an tarlang bawk.

Hetihlai hian P&E Department-a Chief Engineer, Lalhmingliani Hmar chuan tunhnai Lockdown leh mipui chetvel inkhuahkhirhna a awm chhunga Electric Bill siam dan chungchang ah hian thuchhuah siamin Hrileng laka kan him tlanna tur atana Mizoram Sawrkarin May 10, 2021 atanga Total Lockdown hial a puan tak avangin Consumer Energy Meter Reading lak, Bill sem leh Bill Counter hawn chu tihtawp lailawk a nih thu leh JERC (M&M) Supply Code Regulations,2013 Clause-5.22 tlawhchhana Meter Reading lak theih a nih lai thla hnuhnung pathum a Energy hman zat atanga thlakhat average chhut chhuah hmangin Provisional Bill siam a nih tur thu te, Bill hi sem chhuah a nih dawn loh thu leh Online hmanga Bill pe duh leh pe thei tan Bill hi pek theih a nih tur thu te, Online hmanga Bill pe theilo tan pawh Bill Counter hawn theih a nih veleh hri leng avanga mipui chetvel khuahkhirhna a awm chhunga Bill pekloh tlingkhawm chu Bill pek tlai avanga a pung (late payment surcharge) tel lovin a hlawma pek mai tur a nih tur thu leh Energy Meter Reading a pangngaia lak theih a nih veleh Provisional Bill lo siam tawhah siam rem ngai a awm a nih chuan siamrem a nih tur thu te hi official Circular hmangin tihchhuah a nih thu a tarlang a.

April 2021 thla-a Eng chhit man hi JERC (M&M) in Eng chhit man thar a bithliah hman tan hun chiah a nih thu pawh tarlangin, P&E Department in Bill a siam thin danah April thla a Power hman man hi June thla ah Bill thin a nih avangin a chunga tarlan Provisional Bill pawh hi Eng chhit man thar hmang veka siam a nih thu a tarlang a. Total Lockdown puan a nih tak avangin May,2021 thla laihawl vel atang khan Bill Counter khar lailawk niin, khatih hun lai atanga Bill pe tawh lo tan chuan tun tum (July,2021 thla) a Provisional Bill lo chhuak hi thla thum Bill tlingkhawm a ni tawh dawn tih tarlangin, tun tuma Bill lo chhuak hi thlakhat Bill anga lo ngai tan chuan a lang tam viau thei bawk tih a tarlang bawk.

Comments

Chhiar Hlawhte