CMRF atangin tanpuina sem

Serchhip District in Chief Minister's Relief Fund atanga sum a dawn te chu Lockdown kalpui mek avanga harsatna tawk te chhawmdawlna atan semchhuah leh a ni.

Serchhip District hian June 2 leh 17 khan Chief Minister's Relief Fund atang hian cheng nuai 5 ve ve dawngin a vaiin cheng nuai 10 chu Lockdown kalpui mek laia harsatna tawk, District chhung khaw hrang hranga VLTF ten an report chhungkuate hnenah sem-chhuah leh a ni a. Tun tumah hian tanpuina dawng tur leh semchhuah zat hi a inang lo nual a, Then-zawl West VLTF-ah chhungkaw 68 tan Rs. 62,800/- pek niin a dawng tam ber an ni a, New Serchhip South VLTF ah chhungkaw 58 tan Rs. 53,500/- pek a ni bawk a, East Lungdar VLTF-ah chhungkaw 51 tan Rs. 47,100/- leh Chanmari VLTF-ah chhungkaw 50 tan Rs. 46,200/- pek niin a dawng tam zual an ni.