Ruihhlo tawlh chungchanga Assam sawrkar puhna Mizoram sawrkar in a sawifiah

Mizoram sawrkar-a Home Department chuan tunhnaia Mizoram leh Assam ramri-a innghirnghona thlengah Assam sawrkar in an tihsual thupbo nana ruihhlo chungchanga Mizoram sawrkar a puhna chu nimin khan a chhanglet.

Assam Sawrkar hian July ni 29, 2021-a order (no. HMA.19/42/2021-VIG-H&P/Pt.(l)/ecf:/168844/26) an tihchhuah ah an Police te chu Mizoram atanga Assam rama lirthei tlan lut zawng zawng Assam leh Mizoram ramri ah endik (check) turin thu an pe a. He order-ah hian Assam-a ruihhlo an man te chu Mizoram atanga tawlhluh niin an puh a. Ruihhlo an phur lo tih finfiah a nih hnuah, Sub-Inspector aia hniam lo Police Officer-in chhuahtir a remtih hma chu heng motor te hi hreng turin thu an pe bawk a. Hei hian Mizoram mipui Assam ram paltlanga lirtheia zin veivakte tan harsatna a siamsak dawn tih a lang a ni.

Home Department thuchhuah chuan vawi tam tak ruihhlo tawlhruk tuma Assam ram atanga Mizoram-a lo lut lirthei man a lo ni tawh thin tih tarlangin, amaherawh chu, hei vang ngawt hian khualzinte phurrit siam sak turin Assam atanga Mizoram ramri paltlang lirthei zawng zawng check ngei ngei tur tih thupek chu Mizoram Sawrkar in a la tichhuak ngai lo tih an tarlang a. Assam leh Mizoram inrina paltlanga Mizorama lo lut khualzinte chu zalen takin veivah phalsak an nih laia hetianga Assam Sawrkar thupek hian Mizoram atanga Assam pana lirthei tlan te chu Assam Police ten chhan mumal awm lovin harsatna an siamsak dawn niin a ngaih theih a ni, an ti. 

Sawrkar thuchhuah tarlan danin kum 10 liam ta chhung khan Assam ram atanga Mizoram-a ruihhlo tawlhluh tum tam tak man a lo ni tawh tih pawh tarlangin, heng an drugs man te hi Heroin kg 1.05 a rit, Pseudoephedrine kg 3057.08 a rit, Parvon Spas mum 4,30,385, Ganja 24.114 kg a rit leh Proxyvon mum 13053 a tling tih an tarlang a. Hemi kaihhnawihah hian case 296 ziahluh a ni tawh a, Assam mi 395 man an ni tawh bawk.

Ruihhlo hmanga sumdawn hi State pakhat chauh tihtawp theih a ni lo tih pawh Mizoram sawrkar thuchhuah chuan tarlangin, khawvel pumpuiin a buaipui a nih thu leh he buaina chingfel tur hian tanrual a ngaih thu an tarlang a, State pahnih ramri dep-a District Police duty te inlungrual taka an thawhhona hnuaiah lo chuan Drugs tawlhluh hi dan beh theih a ni lo, an ti a. Ruihhlo dona kawnga hmalakna ah pawisawi lo te tul loa vaukhan leh harsatna siamsak chu thil tih chi a nih loh thu an tarlang bawk.