'Ramri chinfel dan thuruk ka hria' titu chuan tun hi a thuruk a puan hun a ni dawn lawm ni? - MZP

Mizo Zirlai Pawl (MZP) General Headquarters hruaitute chuan Mizo thalai tam tak te chu ramri humhalh duh vanga thisen hial chhuak tawh an ni tih sawiin, ramri chungchang lemchanna (Drama) awm thin chu an haw takzet tih an sawi a. “'Ramri chinfel dan thuruk ka hria' titu chuan tun hi a thuruk a puan hun a ni dawn lawm ni?” an ti.

MZP General Hqrs. hruaitute chuan nimin khan an President, B. Vanlaltana hovin Aizawl-a an Pisa-a thuthar thehdarhtute kawmin tunhnaia Assam leh Mizoram ramri-a buaina thleng chungchang hi an sawi a. MZP hruaitute chuan MZP chu zirlaite hamthatna atana bei tura pawl din anga hriat ni mahse, ram leh hnam humhalhna leh hmasawnna turin nasa takin an thawk tho tih an sawi a. Thangtharte tana chenna tlaka Mizoram siam chu an tum ber zing a mi a ni bawk tih sawiin, hei vang hian ram leh hnam humhalhna leh hmasawnna a nih dawn phawt chuan eng harsatna (issue) atang mahin MZP hi a tlanchhe thiang lova, kut a kuangkuah thei bawk hek lo tih an sawi.

MZP hruaitute chuan MNF Party chu India sawrkar laipui do-a kum 20 chhung zet lo rammu tawh an nih avangin ramri buai kan neih chungchang pawh hi an chinfel theih mai an ring tlat tih sawiin, kum 2018 December thla atanga MNF party in sawrkarna a siam pawh khan beiseina sang tak an nei tih an sawi a. July 8, 2019-a Council of Minister Meeting-in Mizoram ramri atana BEFR 1875 ramri a pawm phei kha chuan kut an lo beng ve hial tih sawiin, “Mahse, an sawrkar kum 3-na kan hman mekah hian tun hma zawng aiin Assam sawrkar chuan min zuam a, tun hmaa an rama an rawn chhal ngai loh hmun, Mizo ten kum za tel lo leh huan an lo siam tawhna Aitlang pawh Assam ram tiin kan mit hmuh lai ngeiin min rawn chhuhsak a, hei hian Mizo mipui rilru a tina takzet a ni,” an ti.

Ramri chungchang ah hian June 28, 2021 khan Delhi-ah Joint Secretary, Union Home Ministry hnenah Memorandum an thehlut tih sawiin MZP hruaitute chuan, hemi tuk, June 29, 2021 atangin Assam sawrkar chuan Mizoram chhungah buaina a rawn siam tan tih an sawi a. Aitlang-a Assam Police te rawn inkulhna chu Mizoram sawrkar in BEFR 1875 ramri a pawm chhung a nih avangin Assam Police te an inhnuhdawh hma chuan eng inbiakna mah Assam sawrkar neihpuilo turin Mizoram sawrkar an ngen hnuah Mizoram sawrkar chuan Chief Secretary Level-ah July 9, 2021 khan inbiakna a neihpui lui tih an sawi a. “Kan rin ang ngeiin engmah an sawifel thei chuang lova; inbiakna ah hian BEFR 1875 ramri chungchang pawh an sawi chhuak hek lo,” an ti.

Assam lamin min rawn nawr a, buaina a chhuah changa thu leh hla nei a Mizo mipuite min thlamuan thin tura an ngaih Home Minister leh Chief Minister te an ngawi rei thei lutuk thin chu thalo an ti tih an sawi a, “Home Minister Press Conference atanga a lan danin tharum hmanga kan ram rawn luah luitu te nawrchhuah tumna a awm miahlo hi pawi kan tiin a tlawmthlak kan ti takzet,” an ti bawk.

Ramri chungchangah lemchanna thu chhak-chhuak fo tawh lo turin sawrkar thuneitute an ngen tih MZP chuan sawiin, “BEFR 1875 ramri kan humhalh ngam lo a, Assam Official te bulah pawh kan sawi ri ngam leh si lo a nih chuan July 8, 2019 Council of Minister meeting thuchhuak kha hnukdawk (withdraw) leh ngam zawk rawh se,” an ti a. “Thusawi thiamna hmangin kan ramri hi a chhan theih lova, a tak rama huaisen taka hmalakna hi Mizo mipuite’n kan beisei,” tiin kan ram chhung, huan lo ram kan neihna hmun hrang hrang a Assam Police rawn inkulh mekte hi rang taka nawr chhuak nghal turin sawrkar an phu tih sawiin, “Chutianga huaisen taka Mizoram sawrkar hi a che ngam lo a nih chuan kan ramri humhim tura Mizo thalai che chhuakte hi min dang lo ngam turin kan ngen nghal bawk a ni,” an ti bawk.