Mass Testing neih tan MPCC in lawmawm an ti

Mizoram Pradesh Congress Committee (MPCC) chuan Mizoram sawrkar in Aizawl khaw-pui chhunga Mass Testing a nei tan chu lawmawm an tih thu an sawi.

Nimin-a thuchhuah an siamah MPCC Media Department chuan June 7, 2021-a MPCC President, Lal Thanhawla'n Mass Testing nei tura sawrkar a lo ngen tawhna in ngaih-pawimawh a hlawh chho dawn ta leh, hripui dona kawngah sawrkar a harh tan ta nia an hriat avangin an lawm hle tih an tarlang a. Sample Test Runpui (Mass Testing) atan hian sawrkarin sum tam tham tak a sen a ngai dawn tih an hriat thu tarlangin, amaherawhchu, rang taka a veite hmuhchhuah an nih dawn avang leh enkawlna an dawn hma tawh dawn avangin natna hmuhchhuah har avanga Falkawn Referral Hospital leh ICU-a enkawl ngai nasa takin a ti tlem dawn a, chu chuan pawisa tamtak a hum thung dawn a ni, an ti.

Hetih lai hian MNF sawrkar in Lunglei-a RT-PCR Laboratory dinna tur tihkhawtlai dan ringawt a zawng chu hriatthiar har an tih thu pawh MPCC chuan sawiin, RT-PCR hmanga MNF sawrkar Politics khelh dan chu mipui hriselna atana hlauhawm tak leh mipui zahlohna dik tak ni ah an ngai tih an sawi a. Awmze nei zawka COVID-19 kan do theih nan District tinah a rang thei ang bera RT-PCR khawl hman theihna tur Laboratory din turin sawrkar an phut nawn thu leh hei hi COVID-19 hrileng thawh thumna (Third Wave) inbuatsaihna atana tih makmawh a ni tih an sawi a. “Falkawn-a District TB Centre chung ber Room ruaka awlsam taka Laboratory din anih dan ngaihtuahin, he thil hi harsa lo taka tih hlawhtlin theihah Congress Party chuan a ngai a ni,” an ti a. “Hripui hi tangruala do chi a nih avangin Eptu party te thurawn ngai pawi-mawh tawh turin Congress party chuan Mizoram sawrkar a beisei bawk a ni,” an ti bawk.