Chanchin thar thenkhat :

Black Fungus la awmlo

Nimin-a Health Minister, Dr. R. Lalthangliana hova a enkawl Department hmalak dan thlirletna neih ah Health Department hotute chuan vanneihthlak takin tun thlengin Mizoram-ah Black Fungus vei an la awm lo tih an sawi a. Tun dinhmun ah COVID avangin Mizoram chhung hmun 43 chu Containment leh Micro Containment Cone-ah puan a ni tih pawh sawiin, mi thilphal ten Mizoram tan Oxygen Concentrator 1066 a thlawnin an pe tawh a, chung zinga 721 chu damdawi In leh CCC hmun hrang hranga hman turin thawnchhuah a ni tawh bawk. Oxygen plant neihsa bakah Aizawl leh District Headquarters tinah dah belh a ni dawn a, PM Cares atangin 1000 LPM pahnih - ZMC-a dah tur pakhat leh Civil Hospital-a dah tur pakhat dawn a ni bawk.

Zirlai tithate chawimawi

Kolasib Sub-Hqrs. YMA chuan nimin khan Kolasib District atanga HSLC leh HSSLC Exam result chhuaka tithate chawimawina hun Diak-kawn Branch YMA Committee Room-ah an nei a, he hunah hian Mizoram pum-a Top 10-a lang phak zirlai 6 te bakah ri hriatna lama harsatna nei chunga HSLC Exam-a Distinction-a pass HK. Lalrinawmi d/o Lalpiangliani te hnenah thu-ziak leh pawisafai an hlan a ni. Nimin-a he hun an hman hi Kolasib District Bawrhsap, Dr. H. Lalthlangliana chuan khuallian nia hmanpuiin taimakna leh nungchang tha leh dikna nunpui chu hlawhtlinna kawng a thil pawimawh tak a ni thu a sawi.

CMRF-ah vbc. 3 la awm

COVID-19 hrileng mek laka mipui an him theih nan leh a tul apianga hman tura mimal, pawl leh Kohhran ten Chief Minister's Relief Fund for COVID-19 a sum an thawhkhawm chu nimin thleng khan Rs. 29,18,62,678/- a tling tawh a. Heng atang hian Rs. 25,31,14,470/- chu tul leh pawimawh hrang hrangah hman ni tawhin tunah hian Rs. 3,87,48,208/- chu ala awm mek bawk a ni.

MPYCC in Puan In an hlan

Congress Thalaite chuan nimin khan Vairengte tlawhin Mizoram Police duty-te tan Puan In (Tent) leh êng chhit tur (Camp light) an hlan. Mizoram Pradesh Youth Congress Committee (MPYCC) te hian nimin khan an President, Dr. Lalmalsawma hovin Vairengte khua tlawhin Assam leh Mizoram ramri innghirnghona avanga Mizoram Police duty-te tan Puan In (Tent) leh êng chhit tur (Camp light) a tulna apianga hman turin Vairengte Police Station-a awm mek Kolasib SP, Vanlalfaka Ralte hnenah an hlan a, MPYCC President chuan ramri-a duty-te mamawh phuhruk vek thei lo mahse engemaw chen tala an awlsam zawk nan 'Tent' panga (5) leh 'Camp light' hi an pe tih a sawi a ni.

BJP in bungrua an hlan

BJP Mizoram Pradesh chuan nimin khan Vanapa Group YMA (Hnahlan) te hnenah Oxygen Concentrator, PPE Kit leh Health & Hygiene Kit te an hlan. BJP Mizoram Pradesh hian Oxygen Concentrator, PPE Kit leh Health & Hygiene Kit te hi State pawn atanga chahlutin COVID-19 vanga kan harsatna sukianna tur atan an semchhuah mek a, nimin khan Vanapa Group YMA President, Lalrotluanga hnenah BJP Champhai District President, C. Hrangsatkima chuan a hlan a, Hnahlan khua hi Containment Zone-a puan mek a nih avangin Cham-phai-ah inhlan niin Group YMA hruaitute chuan an mamawh tak an pe chu an lawm hle tih an sawi.

Police Duty-na tur sa

Taitesena Group YMA chuan nimin khan Mamit District chhunga Chuhvel ramri-a Assam lamin kawngpui sial an tumna hmunah hnatlang neiin Mizoram Police te awmna tur In pahnih leh Choka pakhat an sa a, he hnatlang ah hian Group huamchhunga Kawrtethawveng North leh South, Darlak, Tuidam, Zamuang, Hriphaw leh Saikhawthlir Branch atangin mi 200 vel an thawkchhuak a ni