Chanchin thar thenkhat :

Raltlan 1700 vel khawsa mek

Myanmar tualchhung buaina avangin Mi-zoram-ah raltlan awm belh zelin raltlan rawn luh tamna ber nia hriat East Tuipui bial-ah raltlan mi 1700 vel an khawsa mek. Thudawn danin tuna raltlan rawn lut zinga mi 1473 chu khaw hrang hrangah an awm darh a, mi 245 erawh chu ramhnuai ah silpaulin zarah an inkhuar mek a, ramhnuaia inkhuar te hi an khaw lamah an feh thin niin an sawi. Raltlan zingah hian khawsak harsa deuh te awm bawk mahse a tlangpuiin an ngaihtuahawm lutuk lo niin an sawi a. Chhung-kaw thenkhat chu an tu leh fa, US leh hmundang a awm ten sum an rawn thawn thin a, raltlan thenkhat chu an inhlawh bawk nia thudawn a ni. Raltlan hi Myanmar ramri dep khaw hrang hrangah an khawsa mek a, Hnahthial District chhungah chuan raltlan hi mi 619 an awm mek nia thudawn niin Lawngtlai District bakah Champhai District khaw thenkhatah an awm bawk niin an sawi.

Ramri kanin la rawn lut

Inrinni khan Assam Police, Official dangte leh Assam lam-a khawtual mite chu Mizoram-ah vawi thum lai an rawn lut leh a, ramri-a boruak sosang chu a hniam thei vak rih lo. Inrinni zing dar 6:00 vel khan Assam Forest leh Police 10 chuang chu Buarchep ramah an rawn lut a, kir leh tura Mizoram Police-te’n an hriattir bakah Assam lama CRPF duty-te pawhin kir tura an tih hnu-ah chawhma dar 11:30 vel ah an kir leh a. Chawhma dar 10:00 velah Assam Police mi 30 vel leh helai khaw hnai ami mi 20 vel chu Vairengte ram chhung Aitlang Zau-ah an rawn lut leh a. Dar 11:00 velah Police ho bawk Vairengte khawchhak lama Mautui Zau-ah an rawn lut leh bawk a, buaina chhuak leh thil duhawm thleng erawh a awmlo a ni.

Lunglei West Bial fang leh

Lunglei West bialtu MLA, C. Lalrinsanga chuan Inrinni khan a bial chhung Buarpui tlang-dung-a khaw 7 tlawhin khawtlang mamawh leh harsatna an tawh te a hmunah a enpui.

BSI in Target an khum

Bible Society of India (BSI) Aizawl Auxiliary chuan kum kalta 2020-21 a an target chu Rs. 1,28,81,602 in an khum a, COVID-19 hripui leng vangin kumdang erawh an khum lo. BSI Aizawl Auxiliary-a Executive Secretary Rev. Remlalfaka sawi danin sawrkar kum liamta 2020-21 a an target Rs. 3,22,83,000 a nih laiin an sum hmuh chu Rs. 4,51,64,602 a ni a, Target khumna chu Rs. 1,28,81,602 a tling a ni. Kum 2019-20 a an target chu Rs. 3,11,23,000 niin, an sum hmuh chu Rs. 4,96,15,921 a ni a, target hi Rs. 1,84,92,921 in an khum a. Kum liamta a sum hmuh in 2019-20 a phak loh nachhan chu COVID-19 hripui leng vang a nih thu leh an beisei aia tam an hmuh thu a sawi bawk.

MLA in sum in dolet sak

Hmunnghak khua chuan hrilengin hun rei tak min chenchilh tawh avanga khawpui lama harsatna thleng sutkianpuina anih beiseiin Inrinni khan Aizawl South-II bial-a luanchhuahna turin thlai thar hrang hrang an phurlut a, Aizawl South-II bialtu MLA, Lalchhuanthanga chuan hrileng boruak a kuthna-thawktute harsatna leh thawhrimna te hriatthiam puiin, Hmunnghak khaw mite Rs. 30,000/- in a lo dolet ve thung a ni. Aizawl South-II bialtu MLA chuan kut hnathawktu te hi ZPM chuan a ngaih pawimawh ber ber an ni tih sawiin, sawrkarna changtu an la nih loh miau avangin an tan a an tih theih tawk erawh a beitham hrih hle niin a sawi a, an tih theih chinah erawh tlanchhiat an tumlo tih a sawi bawk.

ZPM te pawhin ramri tlawh

ZPM General Hqrs. hruaitute chuan Zir-tawpni khan an Party Secretary General, PC. Vanlalruata hovin tunlai Assam nena ramri in-tihbuaina hmun Vairengte bul Aitlang tlawh tumin a hmun tak erawh Police lamin rem an tih loh avangin an thleng theilo thung. Mizoram sawrkar, Zoramthanga kaihhruai Cabinet Meeting-in 1875 ramri chu kan ramri dik tak a nih zia an lo pawm tawh chu lawmawm an tih thu sawiin, pawm ringawt lova a taka luah ngei tura hma la tur leh 1875 ramri tihlanna Official Map siam turin Mizoram sawrkar chu an phut thu an sawi bawk.