Serchhip Bialtu MLA in ASF tuartute tan ruahmanna hrang hrang siam a nih thu a sawi

Serchhip bialtu MLA Lalduhoma chuan African Swine Fever (ASF) avanga harsatna tawk te mamawha hman turin nimin khan Serchhip bial chhunga VC hrang hrangah Vawk In kah thianghlimna tur damdawi a hlan a. Vawkvulhtu ten harsatna an tawh mek chungchangah hun lo kal zel turah chuan Insurance te pawh kan neih beisei a nih thu a sawi.

Serchhip bialtu MLA, Lalduhoma hian nimin khan lehlanga Serchhip Bial rawn tlawhin tunhnaia ASF avanga Vawk vulhtu ten Vawk In tihfaina atana an hman turin Serchhip Bial chhunga Village Council 18 (Serchhip-ah 12, Thenzawl-ah 4 leh Buangpui leh Neihloh) te hnenah damdawi hmanga Vawk In tihfaina tur, Sodium Hypochloride litre 5 theuh a hlan a. Hri leng avanga hmun hrang hranga kalkual a remchan loh avangin heng damdawi te hi an Party Block hruaitute hnenah hlanin an Party hruaitute hian Village Council Area tinah an semchhuak leh nghal a ni.

Serchhip bialtu MLA chuan Sawrkar hmasa, Congress sawrkar lai khan PRRS, Vawk natna chi khat in min nuai tawh tih sawiin, sawrkar khan NEDP sum atangin Vawk thi neitute chu a ralna tlem tlem an pe tih a sawi a. Tun tuma African Swine Fever (ASF) lo thleng leh hi a hma ai khan a na ta tih sawiin, tunhnaiah AH&Vety Minister kaihhruaina hnuaiah Consultative Committee in hemi chungchang hi an ngaihtuah tih a sawi a. Hri leng avanga Vawk suat, an kahhlum tir (Cull) te chu sawrkar Dan dinglai hnuaiah zangnadawmna pek theih a ni sa tih sawiin, amaherawh chu Vawk suat tir ni lo, amah a thi leh sawrkar lam hriatpuina lova lo tihhlum te pawh a neitu tan chuan a tawrhnat dan a thuhmun reng avangin suat leh suat loh thliar hrang lovang an tih thu a sawi a. “Tichuan, a vai hian sawrkar hian Disaster-ah min puan sak rawh se kan ti a ni,” a ti a. Disaster-a puan a nih loh chuan zangnadawmna lak theih a ni lo tih sawiin, chuvang chuan DM&R hnuaiah Disaster-a puan sak tura dil a nih thu leh an phal sak chuan a vai hian zangnadawmna in pek dan tur kawng la dap leh tur a nih thu a sawi a, engtik ni-ah emaw chuan tlem azawng tal chu zangna-dawmna an la dawng thei turah an ngaih thu a sawi a. Hei bakah hian a ral-a ralna ang pawh ngaihtuah nise an tih thu a sawi bawk.

Lalduhoma chuan Insurance tih chu a pawi-mawh ber a ni tih pawh sawiin, hetiang atan hian Mizoram-ah Scheme a awmloh thu a sawi a. Private Company-ah te chuan a tih theih dan awm mah se senso a tam avangin kan tlinlo a ni, a ti a. “Sawrkar in-a min tih sak a, kumtin-a a Vawk neitute pawhin an chawi ve tur ang kha thui tak sawrkar in min pek kep a ngai a, chutiang zawng chuan a tih ve theih a, chuvang chuan a Insurance Scheme pawh hi a kawng lo dap nghal rawh u,” tia thutkhawm ah hian an tih thu leh hun lo kal zel turah chuan Insurance te pawh kan neih ve beisei a nih thu a sawi bawk.

ASF hri kai Vawk damlo te damdawi chu khawvel in ala hmuchhuak lo tih pawh sawiin bialtu MLA chuan, mihring tan erawh a hlauhawm loh tih a sawi a. Vawk In tihfai chu a inven dan a ni ber tih sawiin, hei vang hian Disinfectant te pawh Serchhip Bial chhunga VC Area tin ah sem an ni tih a sawi a. He damdawi hman dan chungchangah mithiam thu leh hla ngaihchan a that thu a sawi bawk.

Serchhip Bial in ASF chu a tuar nasa hle tih pawh bialtu MLA chuan sawiin, Vawk thi tam tak a awm tawh thu a sawi a. Serchhip ah phei chuan a Thlan te pawh tum hnih laih a nih tawh thu a sawi a. Mipuite chu thlabar lutuk lo tura chahin, mithiam te chuan tun thla te a ral chuan reh chho deuh tawh tura an beisei thu a sawi bawk.