Hri leng vanga Vawk thi 27 awmin Vawk suat mek a ni

Nimin khan Serchhip District-ah ASF vanga Vawk thi 27 chhinchhiah belh leh niin hri leng avangin Vawk 6 suat leh a ni bawk.

AH & Vety Department chhinchhiahna atanga a lan danin nimin-a ASF vanga Vawk thi te hi Thenzawl-ah 13, Chhiahtlang-ah 6, New Serchhip-ah 3, Keitum leh P&E Veng-ah pahnih ve ve leh East Lung-dar-ah pakhat te an ni a, Serchhip District-a ASF vanga Vawk thi chu 767 an tling tawh a, Vawk thi tamna ber chu New Serchhip-ah niin Vawk 240 zet a thi tawh a, Thenzawl-ah 210 thi tawhin P&E Veng-ah 157 a thi tawh bawk a ni.

Hri leng avang hian nimin khan Vawk 6 suat leh awmin Serchhip District-a Vawk suat zawng zawng pawh 263 a tling tawh a, Vawk suat tamna ber Thenzawl-ah Vawk 126 suat ni tawhin New Serchhip-ah 61, East Lungdar-ah 32, Chhiahtlang-ah 23, P&E Veng-ah 17 leh Keitum-ah 4 suat a ni tawh bawk a ni.

Serchhip District chhunga Vawk hri lenna hmun-a la puan loh ah nimin khan Vawk thi 13 lai chhinchhiah thar a awm bawk a, Chanmari Veng-ah vawk thi 3 chhinchhiah niin Kawnpui North, Hriangtlang leh Chhingchhip Mualpui-ah Vawk pahnih theuh thiin Hmar Veng, Buangpui, Bungtlang leh Khumtung-ah Vawk pakhat theuh a thi a. Hri lenna hmuna la puan loh ah hian nimin khan Vawk suat 24 lai awm bawkin heng khua ah te hian a vaiin Vawk 141 an suat tawh a ni.