Ramri chungchanga inbiakna nei Chief Secretary ten inremna an nei thei lo

Mizoram leh Assam ramri chungchangah nimin khan sawrkar laipui ruahmanna angin State pahnih Chief Secretary te chuan New Delhi-ah inbiakna an nei a. He inbiakna ah hian inremna nei thei lovin State Sawrkar thuneitu sang zawkte rawn ve ve in, hmalak zel dan tur ngaihtuah ni se an ti.

Nimin-a New Delhi-a inbiakna ah hian Mizoram Chief Secretary Lalnunmawia Chuaungo IAS leh Assam Chief Secretary, Jishnu Barua IAS te telin Mizoram Chief Secretary chuan ramri hrulah hian harsatna awm lovin kum za chuang Mizoten Lo neiin an lo enkawl tawh thin tih a sawi a. Mizoram Sawrkar leh Mizoram mipuite aiawhin Assam Sawrkar chu Vairengte ram chhunga Aitlang-a June ni 29, 2021 atanga Assam Police inkulh mek te chu a rang thei ang bera hnuklet tur leh loneitute thlai leh Thlam an tihchhiat te pawh zangnadawmna pe turin a ngen a ni.

Chief Secretary Lalnunmawia Chuaungo chuan Assam Sawrkar chu Mizo loneitute thlai leh bungrua te tichhe tura Armed Police leh sawrkar official te an tirh tawh loh a beisei thu a sawi a. Hei hian Assam Chief Minister-in June 27, 2021-a Mizoram Chief Minister hnena lehkha a thawna State pahnih te inngeih taka an awm theih a beisei thu a ziah tihhlawhtlinna kawng pawimawh tak a nih thu sawiin, Police chakna hmang lova Dawhkan kila ramri buai chungchang tha taka chinfel a pawimawh zawk thu a sawi. Assam Chief Minister-in June 29, 2021-a Mizoram Chief Minister telephone-a biain ramri buaina felfai taka chinfel theih a nih hma chu May ni 10, 2021-a Assam Chief Minister atana lakluh a nih laia ramri dinhmun ang (status quo)-a awm rih a duh thu a lo hrilh tawh a. Mizoram Chief Minister pawhin chu chu a duhdan a nih thu Assam Chief Minister lo hrilhin, hei hi state pahnih indawr chhunzawm zelna atana boruak tha siamtu a nih tur thu a sawi a ni.

Chief Secretary pahnih te inbia hian inremna an nei thei lova. He inbiakna an neih hnu hian Union Home Secretary Ajay Kumar Bhalla IAS hova meeting neih leh-ah pawh an ngaihdan leh duhdan a inmil theih loh avangin State Sawrkar thuneitu sang zawkte rawn ve ve a, hmalak zel dan tur ngaihtuah nise tih a ni.

He inbiakna ah hian Mizoram Chief Secretary hi Mizoram DGP; Resident Commissioner, New Delhi; Lalthiamsanga Sailo MPS, Joint Secretary, Home Department leh Vanengkima, Scientist, MIRSAC ten an tawiawm a. Assam Chief Secretary hi an DGP leh Officer dang pathumin an tawiawm bawk a ni.