Rul chi thar hmuhchhuah a ni

Mizoram-ah Rul chi (species) thar hmuhchhuah a ni a, Mizo lal hmingthang Vanhnuailiana hming chawiin a hming phuah a ni.

Kumin March thla khan Phulpui khaw ram chhungah he Rul hi man a ni a, Rul vang tak, Stoliczkia khasiensis nen a inan em avangin zirchiang turin Systematics and Toxicology, Department of Zoology, Mizoram University-ah lak niin, amah ang thei ber Rul chi ho te nena uluk taka khaikhin a nih hnuah Stoliczkia khasiensis nen danglamna tam tak a nei tih finfiah niin Science khawvel in a la hmelhriat ngai loh, Species thar a ni tih hriat-chhuah a nih thu Dr. Samuel Lalronunga, Department of Zoology, MZU chuan a sawi a ni.

He Rul hmuhchhuah hi Mizo lal hmingthang tak Vanhnuailiana hming chawiin 'Stoliczkia vanhnuailianai' tia phuah a ni a. “Mizo ten lal leh pasaltha hmingthang tak tak kan neih ho hi Scientific Name-ah a theihna chin chin a dah-a hman hi kan duh ve a,” tiin Dr. Samuel Lalronunga chuan a hming phuah chhan a sawi a. Scientific name hi mahni duh dan ngawta phuah theih a nih loh thu sawiin, “Scientific name hi Latin tawng-a dah niin, mipa hming kan hmang dawn a nih chuan, a tawp ah ‘i’ dah tel a ngai a ni,” a ti.

Stoliczkia vanhnuailianai tih hming an phuah tak Rul hi a phuhlip a sin em avangin Mizo hmingah 'Rulphusin' tih zirchianna neitute'n an phuah nghal bawk a. A Common Name erawh Lushai Hills Dragon Snake tih a ni thung. Rul rawng hi a chunglam uk lam niin, a pang hnuailam deuh atanga eng (yellow) a ni a. Feet khat leh a chanve vela sei niin, tur (venom) nei lo a ni.

He Rul zirna kawngah hian Dr. Samuel Lalronunga bakah K. Lalhmangaiha, Isaac Zosang-liana leh Dr. Esther Lalhmingliani bakah Wildlife Institute of India, Dehradun leh British Museum, London-a an thawhpuite chuan buaipuiin, July 6, 2021 khan Zootaxa Journal-ah pholan a ni.