Latest News

Inkaihhruaina hman zui tur

Serchhip District Bawrhsap Kumar Abhishek chuan nimin khan thupek tichhuakin COVID-19 hri leng hluar zel laka mipuite him theihna tura tun thla ni 2-a inkaihhruaina thupek lo tihchhuah tawh chu Oct. 17, 2021 atanga Oct. 30, 2021 zanlai dar 12:00 thleng Serchhip District-ah hman chhunzawm tur a nih thu a tarlang.

COVID-19 hri kai 520 zet hmuhchhuah leh an ni

Niminpiah khan Mizoram-ah Sample 5801 enfiah leh niin hri kai mi 520 zet hmuhchhuah an ni leh a, Mizoram-a COVID-19 hri kai hmuhchhuah chu 21,854 tling tawhin hri kai hmuhchhuah zat ala tlahniam thei tak tak rihlo a ni.

Niminpiah khan ZMC Laboratory-ah Sample 2161 enfiah niin heng atang hian hri kai mi 177 hmuhchhuah leh an ni a, an vai hian Aizawl District-a Sample lak vek an ni. Central Jail-a tang zingah hri kai 56 zet hmuhchhuah leh niin TNT Centre atangin hri kai mi 5 hmuh leh an ni bawk. Heng bakah hian Veng mal-a hri kai mi 10 aia tam hmuhna Veng pathum awmin Salem Veng-ah hri kai mi 26 hmuh an ni a, Chhianga Veng-ah 13 leh Armed Veng South-ah 12 hmuh an ni bawk.

Mizoram District hrang hranga TreuNat Laboratory-ah pawh Sample 286 enfiah ni bawkin heng atang hian hri kai 37 hmuh leh an ni bawk a, heng zinga 23 te chu Lunglei District ami niin an vai hian Lunglei khawpui chhung ami te an ni a, Mamit District-ah hri kai mi 8 hmuh ni bawkin Champhai District-ah 3 hmuh an ni a, Kolasib, Lawngtlai leh Hnahthial District-ah hri kai mi pakhat theuh hmuh an ni bawk.

Rapid Antigen Test hmangin niminpiah khan Mizoram-ah Sample 3354 enfiah niin heng atang hian hri kai 306 zet hmuhchhuah an awm a, an zinga 176 te chu Aizawl District ami niin Bethlehem Vengthlangm leh Electric Veng-ah 18 ve ve hmuh an ni a, Chhinga Veng-ah 15 leh Bawng-kawn-ah 10 hmuh an ni a, hri kaina hriatloh leh chhui zui ngai pawh an la awm nual bawk a ni. Heng bakah hian Kolasib District-ah hri kai mi 75 zet hmuh belh leh niin Lunglei District-ah 27, Lawngtlai District-ah 17, Siaha District-ah 4, Serchhip District-ah 4 leh Mamit District-ah hri kai mi 3 hmuh an ni bawk.

Nimin khan Mizoram-a COVID-19 hri kai enkawl zingah mi 357 te chu hri lakah fihlimin anmahni enkawlna hmun atanga chhuahtir an ni ve leh bawk a. Heti hian nimin thleng khan Mizoram-a COVID-19 hri kai hmuhchhuah chu 21,854 niin heng zinga 18,383 te chu hri lakah fihlimin enkawl dam an ni tawh a, hei hi hri kai hmuhchhuah atanga chhutin za zela 84.11 a ni a, tunah hian hri kai enkawllai 3372 an la awm mek bakah hri kai zingah nunna chan mi 98 an awm tawh a ni.

Comments

Chhiar Hlawhte