Latest News

Govt. Serchhip College zirlai naupang ten PHE Department in Tuikum tui an lakna an tlawh

PHE Department-in Serchhip mipuite châwmtu tui lâkna, Greater Serchhip Water Supply Scheme chu nimin khan Govt. Serchhip College-a zirlai naupang ten tlawhin, Tuikum lui-a tui an lâkna atanga tui an sem chhuah thleng a hmuna kalin an en.

Govt. Serchhip College zirlai naupangte hi Sr. SDO, Er. Samuel LR. Ralte chuan Tuikum lui-ah lo dawngsawngin, Serchhip tui lâkna atana an hnathawh dan tlangpui a sawifiah a, Tuikum-a Sectional Officer, Biakzamvela Sailo chuan zirlai naupangte chu tui lakna atana hmanrua leh khawl hrang hrangin hna a thawh dante a hmunah kawhhmuhin a hrilhfiah a, zirlai naupangte hian zawhna an neih hrang hrangte an zawt nghal a ni.

Nimin-a Tuilakna hmun tlawhtu zirlaite hnenah hian PHE Serchhip WATSAN Division a Sr. EE, Er. F. Lalsanglura chuan PHE Department chuan kumin, 2021 chu 'Tui hlut kum'-a an puan thu sawiin, zirlai naupangten an hnathawh dan a hmuna an hmuhpui chu lawmawm a tih thu a sawi a, PHE Department-in mipuite hnena tui sem chhuak tura an hnathawh dan chu mi tam takin an hriatpui loh avangin tui hlutna an hrethiam tawk lo thin tih a sawi a, Mizoram chu tlangram a nih avangin mipuite hnena tui sem chhuah hna thawh chu a hautak hle tih a sawi a, an Department-a hnathawktu zinga chhun zan zawma hnathawktu engemawzat an awm tih a sawi bawk.

Greater Serchhip Water Supply Scheme tlawhtu zirlai naupangte pawhin thu sawiin, PHE Department-in mipui hnena tui sem chhuak tura hna an thawh nasat dan a taka an hmu thei chu lawmawm an tih thu leh an hnathawh dan chu ropui an tih thu sawiin, khawl hnathawh dan leh tui tihthianghlim dan hrang hrangte chu an hriatna a tihzauh phah bakah tui hlutna leh tui renchem a tulzia an hriat thar phah tih an sawi a, mi tam zawkin tui ren nachang leh tui hlut nachang an hriat theih nan PHE Department hnathawh dan chu a takin hmuhpui ve thei se an duh thu an sawi bawk a. He College Principal, PC. Lalremsiama pawhin zirlai naupangte chu PHE Department-in mipuite hnena tui sem chhuak tura an hnathawh hautak zia a taka an hmuh atangin midangte hnena tui hlutzia zirtir chhawngtu ni turin a chah a ni.

He huna zirlaite kaihruaitu Er. Samuel LR. Ralte chuan Greater Serchhip Water Supply Scheme chu kum 1997 atanga hman tan a nih thu sawiin, a design-ah chuan kumin hi a tawp kum a nih tawh thu sawiin, tunah hian a tira tui pump chhuah theih tur zata chhut aia tam tui pump chhuah a ngai tawh tih a sawi a, tui pump-na khawlte leh hmanraw dangte chuan Serchhip mipui a châwm zawh tawh loh avangin tui sem dan pawh semrual a ngai tawh tih a sawi bawk.

Comments

Chhiar Hlawhte