Latest News

Zirlai tithate Chief Minister's Award hlan an ni

High School Leaving Certificate (HSLC) leh Higher Secondary School Leaving Certificate (HSSLC) Examination-a zirlai tithate hnenah nimin khan ‘Chief Minister's Award’ hlan a ni.

Chief Minister's Award hlanna inkhawm School Education Department buatsaiha Education Centre Conference Hall, Aizawl-a neih ah hian Chief Minister, Zoramthanga chuan India ram State zinga Board Exam pangngai taka nei thei awmchhun kan ni chu thil ropui tak a ni tih sawiin, hemi atana Education Minister leh Department thawktu zawng zawng te, nu leh pa leh zirtirtu leh zirlai zawng zawngte tih hram hramna leh thawhrimna chungah lawmthu a sawi a. Mizoram chu India rama kilkhawr ber pakhat, mihring cheng tlem te, harsatna chi hrang hrangin a bawm, mamawh phurhthlen hahthlak ber zing ami State ni mahse malsawmna tam tak a dawn thu a sawi a. Lawmman dawngtute chu a lawmpui thu a sawi bawk.

School Education Minister, Lalchhandama Ralte pawhin HSLC leh HSSLC Topper, Chief Minister's Award dawngtute chu a lawmpui thu sawiin, Hripui karah Department in theihtawp chhuahin, Class mumal taka kal hlei thei lo chung leh Syllabus titlem a, Online Class nen buai taka kal chunga pangngai taka exam buatsaih theih a ni chu lawmawm a tih thu a sawi bawk. Minister chuan School Education Department chu Department zingah COVID-19 avanga harsatna tuar nasa ber zing ami a nih thu sawiin, Online class buatsaih chu thenkhatin chhawr tangkai mahse harsatna hrang hrang avanga mumal taka Online Class la ve theilo an awm thu a sawi a. Rualkhai zawka zirna pek a nih theih nan ruahmanna thar siamin, zirtirtute chu School-ah kal tawhin, Headmaster/Principal te enpuina hnuaia Online Class a mi tur inbuatsaih turin ruahmanna thar siam a nih dan te a sawi a. School building thenkhat, COVID vei enkawlna leh Quarantine na atana hman a awm tih a hriatpui thu sawiin Minister chuan, heng hmun te hi Mizoram-a School awm zawng zawng atanga en in 10% bawr vel nia hriat a nih thu leh, chung School te tan chuan remchanna dang an lo siam theih thu leh, harsa chung chunga intihluihna a awmloh thu a sawi bawk.

Kumin hian Chief Minister's Award hi HSLC Exam-a Mizoram puma pakhatna, Lalnunmawia S/o RL. Chanchinmawia & Saitluangi, Durtlang North, Aizawl, St. Joseph HSS; HSSLC (Arts)-a pakhatna Sylvia Lalhmingmawii d/o C. Thanga & Lalrelfeli, Tuikual South, Aizawl, Oikos HSS; HSSLC (Science)-a pakhatna Lalengzauva S/o Lalthakima & Lalbiakngheti, Ramhlun South, Aizawl, St. Paul's HSS leh HSSLC (Commerce)-a pakhatna C. Lalrintluangi D/o C. Lalduhawma & Lalbuatsaihi, P&E Veng, Serchhip, Oikos HSS te hnenah hlan a ni a, Award hian thuziak leh Rs. 50,000/- a kengtel a ni.

Comments

Chhiar Hlawhte