Chanchin thar thenkhat :

Champhai South Bial fang

Champhai South bialtu MLA leh Law & Judicial Minister, TJ. Lalnuntluanga chuan nimin atang khan a bial fangin HSLC leh HSSLC Exam (2020-2021)-a hlawhtlinna changte chu khawtlang hruaitute kaltlangin lawmpuina thilpek a hlan a. Nimin-a lawmpuina a hlan te hi Tuipui-ah 13, Chhungte-ah 7, Jail Veng-ah 4 leh Kanan Veng-ah 59, an vaiin mi 83 te niin HSLC pass-te hnenah JF. Laldailova Dictionary (English to Mizo) leh HSSLC pass-te hnenah Oxford Dictionary (English to English)-te hlan an ni. Hemi rual hian VLTF te pawh tlawh nghalin hri leng dona kawnga an mamawh turte a hlan nghal bawk. Forest Department changtu Minister ni bawk TJ. Lalnuntluanga hian Mualzen ram-a Forest Nursery-ah thingtiak a phun nghal bawk a ni.

SOP siamtha turin hriattir

Gauhati High Court, Aizawl Bench chuan Mizoram sawrkar in COVID-19 SOP a siam thar berah vaccine la tawhte chauh dawr nghah, hna dang thawh, mipui phur lirthei khalh leh active case tamna hmuna thil tul ti tura kal a remtih chu siamtha turin Mizoram sawrkar a hriattir a. SOP siam thar tho in heng thil ti turte chu vaccine la tawh pawh ni se, hmai tuam tur leh hripui laka invenna thil dang ti tura a phut tho avangin tuna vaccine la la lo te vaccine an la lak loh avang chauha a khuahkhirh chu a àwm lovin behchhan nei lova thil tihah ngaiin SOP hi siamtha turin a hriattir a ni.

Exam buatsaih leh dawn

Mizoram Board of School Education (MB-SE) chuan Mizoram District hrang hranga Centre 11-ah te July 23-30, 2021 chhung khian High School Leaving Certificate (HSLC) Compartmental Exam chu a buatsaih leh dawn a. Exam tur tan tun thla ni 13 thleng Centre Superintendent te hnenah Exam Form Fill-up theih a ni anga, Exam Fee Rs. 500/- bakah Centre Fee Rs. 150/- chawi tur a ni anga, Practical Fee Rs. 100/- a ni bawk ang.